ગાંધીનગર : ગાંધીનગરના વાસણા હડમતીયા વિસ્તારમાં આવેલા સામ્રાજ્ય ફાર્મહાઉસમાં મહેફિલ માણવા માટે ભેગા થયેલા મિત્રો વચ્ચે તકરારમાં ફાયરિંગ થઈ હતી.ફાર્મહાઉસના માલિકને છાતીમાં ગોળી વાગતાં તેમને નજીકની ખાનગી હોસ્પિટલમાં લઈ જવાયા હતા,પરંતુ તેમનું મોત થયુ હતું.ગોળી ચલાવનાર સહિત અન્ય એક મિત્ર કારમાં નાસી છૂટ્યો હતો, જ્યારે અન્યોની ધરપકડ કરી પોલીસે વધુ કાર્યવાહી હાથ ધરી છે.
જૂના હિસાબ-કિતાબનો વિવાદ લોહિયાળ બન્યો
પોલીસ સૂત્રો પાસેથી મળતી માહિતી મુજબ, સરગાસણ રોડ પર આવેલા સામ્રાજય પાર્ટી પ્લોટના માલિક પ્રવિણ કલ્યાણ માણીયા,જયદીપસિંહ ગોહિલ,તરુણસિંહ તેમજ સંતોષ ભરવાડ,હરપાલસિંહ જનક જયરાજસિંહ તેમજ મોહિત એમ આઠ મિત્રો શુક્રવારે દારૂની મહેફિલ માણવા ભેગા થયા હતા.પાર્ટી આપવાની બાબતે ચર્ચા બાદ નાણાની લેતી-દેતી મામલે ઉગ્ર બોલાચાલી શરૂ થઈ હતી.પ્રવિણભાઈ અને જયદીપસિંહ તેમજ તરુણસિંહ વચ્ચેની તકરાર કાબૂ બહાર જતાં અન્ય મિત્રો સમજાવવા વચ્ચે પડ્યા હતા.પરંતુ, જયદીપસિંહે પોતાની પાસેની રિવોલ્વર બહાર કાઢી હતી અને પ્રવીણસિંહને છાતીમાં ગોળી મારી હતી.
હત્યારાને રોકવા અન્યોએ પ્રયાસ કર્યો
અત્યંત નજીકથી છાતીમાં ગોળી વાગતા પ્રવીણભાઈ સ્થળ પર ઢળી પડ્યા હતા અને આ ઘટનાથી ફાયરિંગ કરનાર જયદીપસિંહ તથા તેનો મિત્ર તરુણસિંહ પણ ગભરાઈ ગયા હતા.તેઓ કારમાં નાસી છૂટ્યા હતા ત્યારે એક મિત્રે તેમને રોકવા પ્રયાસ કરતાં મારામારી થઈ હતી. પ્રવીણભાઇને આશકા હોસ્પિટલમાં લઈ જવામાં આવ્યા હતા,પરંતુ તેમને બચાવી શકાયા ન હતા.
મિત્રો વચ્ચેની બેઠકમાં ફાયરિંગના પગલે તલવારો પણ વિંઝાઈ હતી.તલવારથી હુમલામાં એક ઈસમ ઘાયલ થયો હોવાનું જાણવા મળ્યું છે.હાલ તેને ગાંધીનગર સિવિલમાં દાખલ કરાયો છે અને તેનું નિવેદન લેવા તજવીજ ચાલી રહી છે.
પોલીસે સીસીટીવી કબજે કર્યાં
મોડી રાત્રે સર્જાયેલી ઘટના અંગે જાણ થતાં સેકટર – 7 પીઆઈ ડી એસ ચૌધરી, ઈન્ફોસિટી પીઆઈ પી પી વાઘેલા,લોકલ ક્રાઇમ બ્રાંચના પીઆઈ એચ પી ઝાલા, જે એચ સિંધવ સહિતનો કાફલો સ્થળ પર દોડી આવ્યો હતો અને સીસીટીવી ફુટેજ સહિતના પુરાવા એકત્ર કર્યા હતા. દારૂની મહેફિલ માણતા અન્ય મિત્રોને પણ પોલીસે ઝડપી લીધા હતા.હાલમાં અન્ય મિત્રોની સંડોવણી છે કે નહીં તે બાબતે પૂછતાંછ ચાલી રહી છે.
જમીનની લે-વેચનો વિવાદ હોવાની શક્યતા
સૂત્રો પાસેથી મળતી માહિતી મુજબ, 57 વર્ષીય પ્રવીણભાઈ માણીયા મૂળે ભાવનગરના છે,પરંતુ હાલ સિધ્ધરાજ ઝેડ પ્લસમાં રહે છે.જમીન લે-વેચના વ્યવસાય સાથે સંકળાયેલા પ્રવીણભાઈ અને મિત્રો અવાર-નવાર સામ્રાજ્ય ફાર્મહાઉસમાં ભેગા થતા હતા. શુક્રવારે રાત્રે બોપલ ખાતે રહેતા જયદીપસિંહ અને તરુણ સિંહ કાર લઈને દારૂ પીવા માટે આવ્યાં હતા.જમીનની લેતી-દેતીના વિવાદે લોહિયાળ સ્વરૂપ ધારણ કર્યું હોવાની આશંકા સેવાઈ રહી છે.
મૃતક કોંગ્રેસમાંથી બે વખત ચૂંટણી લડ્યા હતા
ગાંધીનગરમાં સ્થાયી થયેલા પ્રવીણભાઈ રાજકીય રીતે કોંગ્રેસ સાથે સંકળાયેલા છે.સૂત્રો પાસેથી મળતી માહિતી મુજબ, તેઓ અગાઉ બે વખત કોંગ્રેસમાંથી ભાવનગર જિલ્લા પંચાયતની ચૂંટણી લડ્યા હતા,પરંતુ હારી ગયા હતા.તેમના પરિવારમાં પત્ની અને બે સંતાનો છે,જેમાંથી દીકરીના લગ્ન થઈ ચૂક્યા છે.
એફએસએલની ટીમ તપાસમાં લાગી
ડીવાયએસપી એમ.કે. રાણાએ જણાવ્યું હતું કે, ફાયરિંગમાં પ્રવીણભાઈની હત્યાના મામલે ફાર્મહાઉસમાં ભેગા થયેલા તેમના મિત્રોને રાઉન્ડ અપ કરાયા છે.આ કેસની તપાસ પી.આઈ. ડી.એ. ચૌધરી હાથ ધરી રહ્યા છે અને એફએસએલ તથા ડોગ સ્ક્વોડની ટીમે સ્થળ પર પહોંચીને વધુ તપાસ હાથ ધરી છે.
