રાજ્યનું પાટનગર ગાંધીનગર આજે આંદોલન નગરી બન્યું હોવાનું ધ્યાને આવ્યું છે.આજે ગાંધીનગરમાં વિવિધ માંગણીઓ સાથે અલગ અલગ મોરચા નિકળી પોતપોતાનો વિરોધ નોંધાવી રહ્યા છે.જેમ જેમ ચૂંટણીની તારીખો નજીક આવી રહી છે તેમ તેમ રાજ્યમાં સરકારના વિવિધ વિભાગોમાં ફરજ બજાવતા કર્મીઓ સહિત પૂર્વ સૈનિકો તેમનો વિરોધ નોંધાવી પોતાની માંગ મજબૂત કરી રહ્યા છે.
ગાંધીનગરમાં છેલ્લા કેટલાય દિવસોથી આંદોલનનો સિલસિલો જારી છે. સરકારના અલગ અલગ વિભાગમાં કામ કરતા કર્મચારીઓ હોય કે પછી આંગણવાડી બહેનો કે પછી પૂર્વ સૈનિકો તમામ પોતપોતાની માંગ રાજ્યસરકાર સામે મૂકીને વિરોધ નોંધાવી રહ્યા છે.ગત અઠવાડિયે મોટાપાયે વિરોધની ભીતિને પગલે રાજ્ય સરકાર દ્વારા રેપીડ એક્શન ફોર્સની ટુકડી તૈનાત કરી દીધી હતી.દરમિયાન રાજ્ય સરકાર દ્વારા કર્મચારીઓની કેટલીક માંગો માની પણ લીધી હતી.પરંતુ તે વાતથી કર્મચારીઓ ખુશ નથી. અને તમામ માંગણીઓ પૂર્ણ કરવાની માંગ સાથે વિરોધ નોંધાવી રહ્યા છે.
આજે વનરક્ષક,નિવૃત આર્મી જવાનો,આંગણવાડી બહેનો,વીલીઇ કર્મચારીઓ તથા ચોથા વર્ગના કર્મચારીઓ ગાંધીનગર પહોંચ્યા છે.અને અલગ અલગ મોરચા કાઢીને સરકાર સામે પોતાની પડતર માંગ મજબૂત કરી રહ્યા છે.ચૂંટણી નજીક હોવાથી રાજ્ય સરકાર પણ આ મોરચાઓને લઇને ચિંતીત હોવાનું સુત્રોએ જણાવ્યું છે.હવે સરકાર સામેની વિવિધ માંગણીઓને લઇને આગળ શું થાય છે તેના પર સૌ કોઇની નજર રહેલી છે.
