ગુજરાત વિધાનસભા ચૂંટણી અંગે મોટા સમાચાર સામે આવી રહ્યા છે. ઉમેદવારો જાહેર થયા બાદ ભાજપમાં ઉભા થયેલા વિરોધ,વિદ્રોહ અને ગૂંચવણનો નિવેડો લાવવા હવે અમિત શાહે કમાન સંભાળી છે.ચૂંટણી માથા પર છે ત્યારે ભાજપમાં ઉભા થયેલા વિરોધના વાતાવરણને હળવું કરવા માટે અમિત શાહે ગાંધીનગરમાં પ્રદેશ ભાજપ કાર્યાલય કમલમ પર હાઇલેવલ બેઠક કરી.
બંધ બારણે કરવામાં આવેલી આ બેઠકમાં રાજ્યમાં ભાજપ નેતાઓનો અસંતોષ ઠારવા માટેની ચર્ચા કરવામાં આવી.આ સાથે બાકી રહેલી બેઠકો પર ઉમેદવારોની જાહેરાત અંગે પણ ચર્ચા કરવામાં આવી,સાથે જ ગાંધીનગર લોકસભામાં આવતી સીટો જીતવા વિશેષ રણનીતિ બનાવવા પર પણ ચર્ચા કરવામાં આવી.આ બેઠકમાં મુખ્યપ્રધાન ભુપેન્દ્ર પટેલ,સી આર પાટીલ અને મનસુખ માંડવીયા પણ હાજર રહ્યાં હતા.
ગુજરાત વિધાનસભા ચૂંટણી માટે ભાજપે 160 ઉમેદવારોની પ્રથમ યાદી જાહેર કરી હતી,ત્યારબાદથી જ પાર્ટીમાં વિવાદ વધી રહ્યો છે.પરિસ્થિતિ ત્યાં સુધી પહોંચી છે કે અમુક નેતાઓને ટિકિટ ન મળતા અપક્ષમાંથી દાવેદારી કરવાની ધમકી આપી રહ્યાં છે.તો ઘણીં એવી બેઠકો છે જ્યાં જાહેર કરાયેલા ઉમેદવારોનો સ્થાનિક નેતા અને કાર્યકરો જ વિરોધ કરી રહ્યા છે.લગભગ 40 બેઠકો પર ભાજપમાં આંતરિક વિખવાદ સામે આવ્યો છે અને પહેલી વાર અમિત શાહ અને નરેદ્ર મોદીના નિર્ણયનો જ વિરોધ કરવામાં આવી રહ્યો છે.
