ગુજરાતના પોલીસના નવા લોગો સાથે બે વર્ષે ત્રણ જોડી ‘ડ્રેસ’નું કાપડ અપાશે

 અમદાવાદ

– અત્યાર સુધી જિલ્લાવાઈઝ અલગ ઓળખની છાપ દૂર કરી ગુજરાત પોલીસની એકસરખી ઓળખ રહે તે માટે ગુજરાત પોલીસ ગણવેશ કમિટીએ મહત્વના નિર્ણય કર્યા છે. ગુજરાત પોલીસના નવા લોગોને યુનિફોર્મ આર્ટિકલ તરીકે સમાવિષ્ટ કરી શર્ટની ડાબી બાજુની બાંય પર લગાવવા નિર્ણય કરાયો છે. પોલીસકર્મીઓને નવા લોગો સાથે દર બે વર્ષે ત્રણ જોડી ડ્રેસનું કાપડ અપાશે.
ગુજરાત પોલીસ ગણવેશ કમિટીની મીટિંગ બાદ DGP શિવાનંદ ઝાએ પોલીસ વર્દીમાં ફેરફારનો અમલ કરવાની સૂચના આપતો પરિપત્ર તા. ૨૬ ફેબ્રુઆરીએ જારી કર્યો છે. પરિપત્રમાં જણાવાયું છે કે, લોકરક્ષક, પોલીસ કોન્સ્ટેબલ અને હેડ કોન્સ્ટેબલ સંવર્ગના પુરૂષ અને મહિલા પોલીસકર્મીઓના યુનિફોર્મ તરીકે આપવામાં આવતા વેબ બેલ્ટમાં GP લખાણવાળું સ્ટેનલેસ સ્ટીલનું બકલ રહેશે. આ પ્રકારના બકલ મળી રહે તે માટે સ્થાનિક ઉત્પાદકો, વિક્રેતાઓ સાથે પરામર્શ કરવા સૂચના અપાઈ છે.
પોલીસ કર્મચારીઓના શોલ્ડર બેઝમાં શહેર-જિલ્લાને નિર્દિષ્ટ કરતો પિત્તળનો ત્રિવર્ણ ચેસ્ટ પર જમણી બાજુ નેમપ્લેટ નીચે પોકેટના ફ્લેપ પર
લગાવવાનો રહેશે.
હાલમાં શર્ટની ડાબી બાજુની બાંય પર MT કે વાયરલેસના બેજ તેમજ શેવરોન લગાવવામાં આવે છે તે શર્ટની જમણી બાજુની બાંય પર લગાવવાના રહેશે. શર્ટની ડાબી બાજુની બાંય પર ગુજરાત પોલીસનો નવો લોગો લગાવવાનો રહેશે. આ સુચનાનો અમલ કરાવવા માટે તમામ પોલીસ અધિકારી, કર્મચારીને જાણ થાય તેવો પ્રબંધ કરાવવાનો રહેશે.
ગણવેશ કમિટીની બેઠકમાં ગુજરાત પોલીસનો લોગો અને યુનિફોર્મ ક્લોથ દર બે વર્ષે ત્રણ નંગ આપવા નિર્ણય કરવામાં આવ્યો હતો. જરૂરિયાત મુજબના નવા લોગોની માગણી દર વર્ષે કરવામાં આવતાં ક્લોધિંગ ઈન્ડેન્ટમાં કરવાની રહેશે.
ગણવેશ કમિટીની બેઠકમાં તમામ પોલીસ કર્મચારીઓની નેઈમ પ્લેટ એકસૂત્રતા જળવાય તે રીતે તૈયાર કરવા નિર્ણય લેવાયો હતો. એક્રેલીક નેઈમ પ્લેટની ઊંચાઈ 2.3 સે.મી. અને પહોળાઈ 9.4 સે.મી. રાખવાની રહેશે અને ગુજરાતીમાં વિગતો લખવાની રહેશે. નિશ્ચિત ફોન અને સાઈઝ સાથે કર્મચારીનું સરકારી રેકર્ડ મુજબનું નામ, હોદ્દો, બક્કલ નંબર અને શહેર-જિલ્લાની વિગતો નેઈમ પ્લેટમાં લખવાની રહેશે. ગુજરાત પોલીસની ઓળખની એકસૂત્રતા જાળવવા આવશ્યક પ્રક્રિયા કરાયાના અઢી મહિને પોલીસ તંત્રમાં એકસરખી ઓળખરૂપ ડ્રેસની તૈયારી કરવામાં
આવી છે.