અમદાવાદ : ગુજરાત વિધાનસભાની ચૂંટણી માટે પ્રથમ તબક્કાના પ્રચાર પડઘમ શાંત થઈ ગયા છે.રાજ્યમાં ચૂંટણીને પગલે આદર્શ આચાર સંહિતાનો ચુસ્ત અને અસરકારક અમલ થાય અને કાયદો અને વ્યવસ્થાની સ્થિતિ જળવાઈ રહે તે માટે પોલીસ તંત્ર દ્વારા પર અસરકારક પગલા લેવામાં આવી રહ્યાં છે.જે અંતર્ગત DGP આશિષ ભાટિયાએ ફરાર આરોપીઓને ઝડપી પાડવા માટે તમામ પોલીસ યુનિટના વડાને સૂચના આપી છે.
રાજ્યના પોલીસ વડાએ વિધાનસભા ચૂંટણીને ધ્યાનમાં રાખીને હાલમાં નાસતા ફરતા આરોપીઓને ઝડપી પાડવા સંદર્ભે સ્પેશિયલ ડ્રાઈવ રાખી હતી. જેમાં એક માસમાં ખૂન,ખૂનની કોશિશ,લૂંટ,ખંડણી સહિતના ગુનામાં સંડોવાયેલા તેમજ પેરોલ જમ્પ કરીને અથવા પોલીસ જાપ્તામાંથી ફરાર થયેલા આરોપીઓ પર ખાસ ધ્યાન કેન્દ્રીત કરવામાં આવ્યું હતુ.જેમાં અત્યાર સુધીમાં આવા 658 આરોપીઓને ઝડપીને તેમને જેલના હવાલે કરવામાં આવ્યાં છે.ઘણી વખત ગુનો આચર્યા બાદ આરોપીઓ નાસી જતા હોય છે અને લાંબા સમયથી પોલીસ પકડથી દૂર રહે છે.આવા આરોપીઓ અન્ય ગુના કરે તેવી પણ શક્યતા રહેતી હોય છે.ખાસ કરીને ગુજરાતમાં નોંધાયેલા ગુનાઓના આરોપીઓ રાજ્યને અડીને આવેલા અન્ય રાજ્યો તેમજ કેન્દ્ર શાસિત પ્રદેશમાં ભાગી જાય છે.
આથી આવા આરોપીઓને ઝડપી પાડવા માટે રાજ્યના પોલીસ વડા આશિષ ભાટિયા દ્વારા ગુજરાતના પાડોશી મહારાષ્ટ્ર,મધ્ય પ્રદેશ,રાજસ્થાન અને દીવ-દમણના પોલીસ વડા સાથે સંકલન સાધીને ઝડપી પાડવા જણાવાયું હતુ.આ માટે ગુજરાત પોલીસની પણ કેટલીક ખાસ ટીમોને જે-તે રાજ્યોમાં મોકલવામાં આવી હતી.આવી ટીમો દ્વારા રાજસ્થાનમાંથી 77, મધ્ય પ્રદેશમાં 39, મહારાષ્ટ્રમાંથી 12, દીવ-દમણ અને દાદરા નગર હવેલીમાંથી 17 ઉપરાંત અન્ય રાજ્યોના 20 મળી કુલ 165 બહારના રાજ્યોમાં નાસતા-ફરતા આરોપીઓને પકડવામાં સફળતા મળી છે.આજ રીતે છેલ્લા 15 દિવસમાં પેરોલ જમ્પ કરીને તેમજ પોલીસ જાપ્તામાંથી ફરાર થઈ ગયેલા કુલ 43 આરોપીઓને પકડીને જેલમાં ધકેલવામાં આવ્યાં છે.
