જે તરફ સરકારી કર્મચારીઓનો ઝોક હોય છે તે પક્ષની જ સરકાર બને છે,સરકારી કર્મચારીઓના અનેક પ્રશ્નો છે,ગુજરાતના સરકારી કર્મચારીઓ અમારી સરકાર બનાવવામાં મદદ કરો,અમે તમારા તમામ પ્રશ્નોનો હલ લાવીશું એવી ગેરંટી આપના સંયોજક અરવિંદ કેજરીવાલે સુરતની પત્રકાર પરિષદમાં આપી હતી.આ સાથે સરકારી કર્મચારીઓ માટે ૩૧ જાન્યુઆરીથી જુની પેન્શન યોજના લાગુ કરવાનો વાયદો અને ગુજરાતમાં આપની સરકાર બની રહી હોવાનો દાવો કર્યો હતો.
૩૧ જાન્યુઆરીથી જૂની પેન્શન યોજના લાગુ કરી દેવામાં આવશે
આપના સંયોજક અરવિંદ કેજરીવાલે સુરતમાં પત્રકાર પરિષદમાં પ્રશ્નોના જવાબ આપવાનું ટાળ્યું હતું પરંતુ સરકારી કર્મચારીઓને આપ તરફે કામ કરવા અપીલ કરતા કહ્યું કે, છેલ્લા થોડા વખતથી ગુજરાતમાં અનેક સરકારી કર્મચારીઓ દ્વારા વિરોધ પ્રદર્શન કરવામાં આવ્યા હતા.પરંતુ તેમના પ્રશ્નોનો નિકાલ ભાજપ સરકાર કરી શકી નથી.
જે રીતે આપે પંજાબમાં જુની પેન્શન યોજના લાગુ કરી છે તે રીતે જ ગુજરાતમાં આપની સરકાર બનશે એટલે ૩૧ જાન્યુઆરીથી જૂની પેન્શન યોજના લાગુ કરી દેવામાં આવશે.વધુમાં કહ્યું કે, જે રાજ્યમાં સરકારી કર્મચારીઓ જે પક્ષ સાથે હોય છે,તે પક્ષની સરકાર બને છે.હાલમાં બેલેટ પેપરથી મતદાન ચાલી રહ્યું છે,તેમાં દરેક મત આપને પડે તેવી અપીલ કરી હતી અને તેની સાથે સરકારી કર્મચારીઓ આપના મતદાન માટે કામ કરે તેવી વાત કરી હતી.
ભાજપવાળા હુમલો કરે તેનાથી ડરીને ખુલ્લેઆમ બોલી શકતા નથી
વધુમાં કહ્યું કે, ગુજરાતમાં ભાજપનો દરેક મતદાર આપને મત આપવા માટે મન બનાવી રહ્યો છે.જે કોઈ જાહેરમાં ભાજપને મત આપવાની વાત કરે છે,તેની સાથે પાંચ મિનીટ વાત કરવામાં આવે તો ત્યાર બાદ તે પણ કહે છે હું પણ આપને મત આપીશ,પરંતુ ભાજપવાળા હુમલો કરે તેનાથી ડરીને ખુલ્લેઆમ બોલી શકતા નથી.ગુજરાત હવે પરિવર્તન માંગી રહ્યું છે.મોટી સંખ્યામાં લોકો આપ સાથે જોડાઈ રહ્યાં છે.૨૭ વર્ષના ભાજપના કુશાસન પછી હવે લોકોને ભાજપથી મુક્તિ મળશે.
મારી રાજકીય ભવિષ્યવાણી પંજાબ અને દિલ્હીમાં સાચી પડી
કેજરીવાલે કહ્યું કે મારી રાજકીય ભવિષ્યવાણી પંજાબ અને દિલ્હીમાં સાચી પડી છે અને ગુજરાતમાં પણ અમારી સરકાર બનશે તેવી મારી ભવિષ્યવાણી છે.ગુજરાતમાં આમ આદમી પાર્ટી ૯૨ સીટ સાથે સરકાર બનાવશે,જ્યારે ભાજપ ૯૨ બેઠકની નીચે રહેશે.કોંગ્રેસ અંગે કહ્યું કે, ગુજરાતમાં હાલ કોંગ્રેસનો મતદાર શોધતા પણ મળતો નથી તેવી હાલત છે.
