ગુજરાતમાં આમ આદમી પાર્ટી દ્વારા અત્યારથી જ 2022ની ચૂંટણીને લઇને તૈયારીઓ શરૂ કરી દેવામાં આવી હોય તેવું લાગી રહ્યું છે.ગુજરાતમાં આમ આદમી પાર્ટીનું કદ વધી રહ્યુ છે.સ્થાનિક સ્વરાજની ચૂંટણીમાં સુરત મહાનગરપાલિકામાં આમ આદમી પાર્ટીએ 27 બેઠકો હાંસલ કરી છે.સુરતમાં આમ આદમી પાર્ટીની કામગીરી જોઈને લોકો હવે આમ આદમી પાર્ટીમાં જોડાઈ રહ્યા છે.પત્રકાર ઈશુદાન ગઢવી,ગાયક વિજય સુવાળા,ઉદ્યોગપતિ મહેશ સવાણી અને આંદોલનકારી પ્રવીણ રામ આમ આદમી પાર્ટીમાં જોડાયા હતા.તો બીજી તરફ હવે ભારતીય જનતા પાર્ટી પણ 2022ની ચૂંટણીને લઇને એક્શનમાં આવી હોય તેવું લાગી રહ્યું છે.
કોરોનાની મહામારી વચ્ચે ગ્રામીણ વિસ્તારના લોકોમાં રાજ્ય સરકારની કામગીરીને લઇને નારાજગી હોવાનું સામે આવ્યું છે.લોકો ભાજપની સરકાર અને સંગઠન પ્રત્યે નારાજ હોય તેવું લાગી રહ્યું છે.તેથી લોકોની નારાજગીને દૂર કરવા માટે મુખ્યમંત્રી વિજય રૂપાણીના અધ્યક્ષ સ્થાને મળેલી કેબીનેટ બેઠકમાં મહત્ત્વનો નિર્ણય લેવામાં આવ્યો છે.બેઠકમાં મુખ્યમંત્રી વિજય રૂપાણી દ્વારા તમામ મંત્રીઓને બે જિલ્લાનો પ્રવાસ કરવાના આદેશ આપવામાં આવ્યા છે.આ બે જિલ્લામાં પ્રવાસ કરીને લોકોની પરિસ્થિતિ શું છે, લોકોની સમસ્યા શું છે અને લોકોમાં કેવા પ્રકારની નારાજગી છે તેની માહિતી મંત્રીઓને મેળવવી પડશે.
પ્રવાસ દરમિયાન મંત્રીઓએ સ્થાનિક વહીવટી તંત્ર સાથે બેઠક યોજવાની રહેશે અને ત્યારબાદ સ્થાનિક સંગઠન સાથે પણ બેઠક કરવાની રહેશે.મંત્રીઓનો બે જિલ્લાનો પ્રવાસ પૂર્ણ થયા પછી તેનો રિપોર્ટ આગામી કેબીનેટ બેઠકમાં મુખ્યમંત્રીને સોંપવો પડશે.સાથે જ મુખ્યમંત્રીએ એવી પણ સુચન મંત્રીઓને આપી છે કે, મંત્રીઓનો પ્રભાવ જે જિલ્લામાં છે તે સિવાયના અન્ય બે જિલ્લાઓમાં પ્રવાસ કરવો પડશે.મુખ્યમંત્રી દ્વારા જિલ્લાઓનું લિસ્ટ તૈયાર કરવામાં આવશે મંત્રીઓને સોંપવામાં આવશે. ત્યારબાદ મંત્રીઓએ આ બે જિલ્લાનો પ્રવાસ કરવાનો રહેશે.લોકોમાં રહેલી નારાજગી દૂર કરવા માટે અને 2022ની ચૂંટણીને ધ્યાનમાં લઈને કેબીનેટ બેઠકમાં આ એક મહત્ત્વનો નિર્ણય લેવામાં આવ્યો છે.
મહત્ત્વની વાત છે કે, કોરોનાની મહામારી વચ્ચે ગામડાની હાલત ખૂબ જ કફોડી બની હતી.ગામડામાં રહેતા દર્દીઓને હોસ્પિટલમાં જગ્યા ન મળતા ઝાડ નીચે અથવા તો મંડપ બાંધીને સારવાર લેવાનો વારો આવ્યો હતો.ત્યારે રાજ્ય સરકાર દ્વારા કોરોનાની મહામારી વચ્ચે કેટલાક ગામડામાં યોગ્ય કામગીરી ન કરવામાં આવતા લોકોમાં સરકાર પ્રત્યે નારાજગી હોવાનું સામે આવી રહ્યું છે.
