વોશિંગટન: ચીન અને રશિયા સાથે વધતા ખતરા વચ્ચે અમેરિકાના રાષ્ટ્રપતિ ડોનાલ્ડ ટ્રમ્પ લગભગ 28 વર્ષ બાદ પરમાણુ બોમ્બ ટેસ્ટ અંગે વિચાર કરી રહ્યા છે.અમેરિકાએ છેલ્લે 1992માં પરમાણુ પરિક્ષણ કરાવ્યું હતું.શુક્રવારે અમેરિકાની ટોચની સુરક્ષા એજન્સીઓ સાથે સંકળાયેલા લોકો દ્વારા પરમાણુ પરિક્ષણ અંગે ચર્ચા કરવામાં આવી હતી.એવું માનવામાં આવે છે કે આ પરીક્ષણનો હેતુ તેના હથિયારોની વિશ્વસનીયતા ચકાસવા અને નવા ડિઝાઇન કરેલા શસ્ત્રો બનાવવાનો છે.
અમેરિકાના અખબાર વોશિંગ્ટન પોસ્ટના અહેવાલમાં એક વરિષ્ઠ સુરક્ષા અધિકારીએ કહ્યું કે જો યુ.એસ.એ મોસ્કો અને પેઈચિંગને બતાવ્યું કે તે ‘ઝડપી પરીક્ષણ’ કરી શકે છે,તો વાટાઘાટો દરમિયાન તે ફાયદાકારક હોઈ શકે છે.અમેરિકા શસ્ત્ર નિયંત્રણ માટે રશિયા અને ચીન સાથે નવી ડીલ પર હસ્તાક્ષર કરવા માંગે છે.
અમેરિકાના આ પરમાણુનો મુખ્ય હેતુ તેના અણુ બોમ્બના વર્તમાન સ્ટોકની વિશ્વસનીયતાની ચકાસણી કરવાનો અથવા નવા પ્રકારનાં પરમાણુ શસ્ત્રો બનાવવાનું છે.ટ્રમ્પ વહીવટીતંત્રે કહ્યું છે કે તે નવા શસ્ત્રો બનાવશે નહીં,પરંતુ જો રશિયા અને ચીન વાટાઘાટો કરવાનો ઇનકાર કરે તો તેઓ શસ્ત્રો બનાવવાનો અધિકાર અનામત રાખે છે.સૂત્રોના જણાવ્યા અનુસાર આ બેઠક દરમિયાન અણુ બોમ્બના પરીક્ષણના પ્રસ્તાવ પર ગંભીર મતભેદ જોવા મળ્યા હતા.
પરમાણુ પરિક્ષણ અંગે અમેરિકાના સત્તાવાળાઓ વચ્ચે કોઈ સહમતિ થઈ ન હતી, પરંતુ ટ્રમ્પ પ્રશાસનના વરિષ્ઠ અધિકારીએ કહ્યું કે “આ પ્રસ્તાવ અંગે ચર્ચા ચાલુ છે”. દરમિયાન,પરમાણુ અપ્રસારને સમર્થન આપનારાઓએ ટ્રમ્પ વહીવટીતંત્રની દરખાસ્ત પર ચિંતા વ્યક્ત કરી છે.તેમનું કહેવું છે કે પરમાણુ પરિક્ષણો કરવાથી અન્ય પરમાણુ હથિયારના ધરાવતા રાજ્યોને તેમ કરવા પ્રેરણા મળશે.આ વિશ્વભરમાં અભૂતપૂર્વ પરમાણુ શસ્ત્રોની હોડને ઉત્તેજિત કરી શકે છે.
વિશ્વની સર્વોચ્ચ મહાસત્તા અમેરિકા પાસે 3800 પરમાણુ શસ્ત્રો છે.આ પરમાણુ બોમ્બ આખી દુનિયાને ઘણી વખત નષ્ટ કરી શકે છે.અમેરિકા પાસે આ પરમાણુ હથિયારો વહન કરવા 800 મિસાઇલો છે.આ મિસાઇલો આંખના પલકારામાં વિશ્વના કોઈપણ શહેરનો નાશ કરી શકે છે.સિપ્રીના જણાવ્યા અનુસાર અમેરિકાએ મિસાઇલ અને બોમ્બર્સમાં 1750 પરમાણુ બોમ્બ તૈનાત કર્યા છે.તેમાંથી,યુરોપમાં અમેરિકા દ્વારા 150 પરમાણુ બોમ્બ તૈનાત કરવામાં આવ્યા છે, જેથી રશિયા પર નજર રાખવામાં આવી શકે.
