ગોંડલ : સૌરાષ્ટ્ર અને ગુજરાતના અનેક શહેરોમાં હવાલા કબાળા કરનાર અને હાલ ગુજસીટોક કાયદા હેઠળ ધરપકડ થયેલા નિખિલ દોંગા ગેંગ માટે ગોંડલની સબજેલને “જલસા જેલ” બનાવવાના ગુનામાં છેલ્લા એક માસથી નાસતા-ફરતા જેલર ડી.કે. પરમારની ગોંડલ સિટી પોલીસે શહેરમાંથી ધરપકડ કરી પૂછપરછ હાથ ધરી હતી.પ્રાપ્ત વિગતો મુજબ નિખિલ દોંગા અને તેના ૧૨ થી વધુ સાગરીતો ઉપર પોલીસતંત્રએ ગુજસીટોકનો કોરડો વીંઝી ધડાધડ તપાસના ચક્રો ગતિમાન કર્યા છે.ત્યારે ગોંડલ શહેરના વોરાકોટડા રોડ પર આવેલ સબજેલને નિખિલ દોંગા ગેંગ માટે જલસા જેલ બનાવનાર જેલર ડી.કે. પરમારનું નામ ખુલતાં જ તેના પગ તળેની જમીન ખસી જવા પામી હતી અને જેલર ધરપકડની બીકે “નો દો ગ્યારાહ” થઈ જવા પામ્યા હતા.ગોંડલ ઘટનાની તપાસ ચલાવી રહેલ પીઆઈ એસ.એમ. જાડેજા,પીએસઆઇ બી.એલ. ઝાલા,હેડ કોન્સ્ટેબલ ઘનુભા જાડેજા સહિતનાઓએ જેલરને પકડી પાડવા કમર કસી હોય ગતરોજ જેલર ગોંડલમાં હોવાની જાણ થતા જ તેની ધરપકડ કરી પૂછપરછ હાથ ધરી હતી અને રિમાન્ડની માંગ સાથે કોર્ટમાં રજૂ કરવામાં આવનાર હોવાનું જણાવ્યું હતું.
જેલર ડી.કે. પરમાર વિરુદ્ધ ૈંઁઝ્રની કલમ ૪૬૬, ૨૬૯, ૧૮૮, ૧૧૪ તેમજ ૨૦૧ મુજબ ગુનો નોંધાવા પામ્યો હતો. જેલર દ્વારા આગોતરા જામીન માટે અદાલતના દ્વાર ખખડાવવામાં આવ્યા હતા પરંતુ તેને આગોતરા જામીન મળ્યા ન હતા. આખરે જેલર પોલીસની ઝપટે ચડી જતા તેની ધરપકડ થવા પામી છે.આશરે બે માસ પહેલા ગોંડલની સબજેલ ખાતે ગાંધીનગર અને અમદાવાદની જડતી સ્કોડે દરોડા પાડયા હતા નિખિલ દોંગા સાથે અન્ય બહારના ૮ થી ૧૦ લોકો બગીચાના ગ્રાઉન્ડમાં કુંડાળુ વાળી ખાણીપીણીની મોજ માણી રહ્યાનું બહાર આવ્યું હતું અને ત્યારથી જેલર ડી.કે. પરમાર વિરુદ્ધ કેદીઓને સુવિધા પૂરી પાડવાના આરોપો લાગવાના શરૂ થયા હતા.
