ઘર કા ભેદી લંકા ઢાએ…

નવી દિલ્હી : લાલુ પ્રસાદ યાદવની મુશ્કેલીઓનો હજી અંત આવ્યો નથી.ઘાસચારા કૌભાંડના એક કેસમાં તેમને જામીન મળ્યાનાં કેટલાંક અઠવાડિયાં બાદ હવે તેમની વિરુદ્ધ ભ્રષ્ટાચારનો નવો કેસ દાખલ કરવામાં આવ્યો છે.જેમાં તેમના પર આરોપ છે કે ૨૦૦૪થી ૨૦૦૯ દરમ્યાન તેઓ રેલવે પ્રધાન હતા ત્યારે ભરતીમાં ગેરરીતિઓ આચરી હતી.આ નવા કેસમાં લાલુ યાદવ સિવાય તેમનાં વાઇફ અને બિહારનાં ભૂતપૂર્વ મુખ્ય પ્રધાન રાબડી દેવી,દીકરી અને રાજ્ય સભાના સંસદસભ્ય મિસા ભારતી તેમ જ અન્ય કેટલાક ફૅમિલી મેમ્બર્સ પણ આરોપી છે.સીબીઆઇએ ગઈ કાલે લાલુ પ્રસાદના નિવાસસ્થાન સહિત તેમની ૧૭ જગ્યાઓએ સર્ચ ઑપરેશન પાર પાડ્યું હતું.
આ નવા કેસમાં સીબીઆઇએ આરોપ મૂક્યો છે કે લાલુ અને તેમના પરિવારજનોએ રેલવેમાં નોકરી અપાવવાના બદલામાં લાંચ તરીકે પટનામાં એક લાખ ચોરસ ફૂટ જમીન મેળવી હતી.પટનામાં સીબીઆઇની આઠ સભ્યોની ટીમ ૧૦,સર્ક્યુલર રોડ સ્થિત રાબડી આવાસ પર પહોંચી હતી.આ ટીમમાં મહિલા અને પુરુષ અધિકારીઓ સામેલ હતા.આ દરમ્યાન આવાસમાં કોઈને પણ આવતા-જતા અટકાવવામાં આવ્યા હતા.આ ટીમ દસ્તાવેજો શોધી રહી હતી.રાબડી આવાસ પર સર્ચ ઑપરેશનના ન્યુઝ ફેલાઈ જતા રાષ્ટ્રીય જનતા દળના કાર્યકર્તાઓ ત્યાં પહોંચી ગયા હતા.
પટનામાં રાબડી દેવી,તેમના મોટા દીકરા તેજપ્રતાપ યાદવની સીબીઆઇએ અલગ-અલગ રૂમમાં પૂછપરછ કરી હતી.પૂછપરછ માટે ૩-૩ અધિકારીઓની બે ટીમ બનાવવામાં આવી હતી.બીજી તરફ દિલ્હીમાં મીસા ભારતીના ઘરે લાલુ પ્રસાદની સીબીઆઇના એસપી અને ડીએસપીના સ્તરના અધિકારીઓએ પૂછપરછ કરી હતી.લાલુની પાસેથી ભરતીને સંબંધિત ફાઇલ્સ વિશે જાણકારી મેળવવામાં આવી રહી છે.
એવો આરોપ છે કે,લાલુએ ૧૨ જણ પાસેથી જમીન લઈને તેમને મુંબઈ,જબલપુર,કોલકાતા,જયપુર અને હાજીપુર રેલવે ઝોનમાં નોકરી અપાવી હતી.લાલુ પ્રસાદની જગ્યાઓએ રેઇડ પડ્યા બાદ બિહારમાં રાજકારણ ગરમાયું છે.એવામાં બિહારના ભૂતપૂર્વ મુખ્ય પ્રધાન જિતનરામ માંઝીએ આ મામલે વિપક્ષ નેતા તેજસ્વી યાદવને ટાર્ગેટ કર્યા છે.તેજસ્વી અત્યારે લંડનમાં છે.એના વિશે કટાક્ષ કરતાં તેમણે ટ્વીટ કર્યું હતું કે ‘ઘર કા ભેદી લંકા ઢાએ,મૌકા દેખ બહાર ઊડ જાએ.તેજસ્વી અત્યારે તેમનાં વાઇફ રાજશ્રી યાદવની સાથે એક કાર્યક્રમ માટે લંડનમાં છે.જિતનરામ માંઝીના ટ્વીટનો રાજકારણમાં એવો અર્થ કાઢવામાં આવ્યો છે કે સીબીઆઇની રેઇડ માટે તેજસ્વી યાદવ જવાબદાર છે.૭૩ વર્ષના લાલુના હજી ગયા મહિને જ ૧૩૯ કરોડ રૂપિયાના દોરંડા ટ્રેઝરી કૌભાંડના કેસમાં ઝારખંડ હાઈ કોર્ટે જામીન મંજૂર કર્યા હતા.