ચીનનાં આક્રમક વલણથી સાઇબર હુમલા અને આર્થિક ઘેરાબંધીથી પરેશાન ઑસ્ટ્રેલિયાએ ચીનની વિરુદ્ધ સેનાને મેદાનમાં ઉતારવાનું મન બનાવી લીધું છે. ઑસ્ટ્રેલિયાએ જાહેરાત કરી છે કે તે હવે ઇન્ડો-પેસેફિક ક્ષેત્રમાં પોતાની સેનાને મજબૂત કરશે અને ચીનને પાઠ ભણાવવા માટે પણ દરેક સમયે તૈયાર રહેશે. ઑસ્ટ્રેલિયાનાં વડાપ્રધાન સ્કૉટ મૉરિસને બુધવારનાં કહ્યું કે સેનાને વધારે મજબૂત બનાવવા માટે હથિયાર ખરીદવામાં આવશે અને એશિયા-પ્રશાંત ક્ષેત્રમાં ઑસ્ટ્રેલિયા ઘણા મહત્વપૂર્ણ વિસ્તારોમાં સેના અને હથિયારો ગોઠવશે.
ચીનની કોઈપણ ધમકીથી ડરવામાં નહીં આવે
પીએમ મૉરિસને બુધવારનાં જાહેર કર્યું કે ચીનની કોઈપણ ધમકીથી ડરવામાં નહીં આવે.આ માટે ઑસ્ટ્રેલિયાએ 270 બિલિયન ડૉલર રક્ષા ખરીદીનો પ્લાન રજૂ કર્યો છે.પીએમે કહ્યું કે,ઑસ્ટ્રેલિયા પોતાના સુપર હૉર્નેટ ફાઇટર જેટ્સનાં યૂનિટને મજબૂત કરવા માટે લાંબા અંતરની એન્ટી શિપ મિસાઇલોની ખરીદી અને દેશની રણનીતિમાં બદલાવ કરવાની દિશામાં આગળ વધી રહ્યા છે.ઑસ્ટ્રેલિયાએ આવું પગલું મિત્ર દેશો,સહયોગીએ અને મુખ્ય ભૂમિની રક્ષા માટે ઉઠાવ્યું છે.ઑસ્ટ્રેલિયાનું સુપર હૉર્નેટ યૂનિટ નૌસેનાનાં સૌથી મજબૂત યૂનિટમાંથી એક મનાય છે.
અમેરિકા પાસેથી ખરીદશે મિસાઇલ
ઑસ્ટ્રેલિયાનાં મીડિયા પ્રમાણે હાલનાં દિવસોમાં ચીન અને ઉત્તર કોરિયાએ લૉન્ગ રેન્જની અનેક મિસાઇલોનું પરીક્ષણ કર્યું છે,જેમાંથી અનેક તો 5500 કિલોમીટર સુધી પ્રહાર કરવામાં સક્ષમ છે, ત્યારબાદ રક્ષાત્મક રણનીતિ પ્રમાણે ઑસ્ટ્રેલિયાએ આ ખરીદવાની જરૂર પડી છે.નવી જાહેરાત પ્રમાણે ઑસ્ટ્રેલિયા જમીનથી લૉન્ચ કરવામાં આવનારી લૉન્ગ રેન્જ સરફેસ ટૂ સરફેસ મિસાઇલ અને સરફેસ ટૂ એર મિસાઇલની ખરીદી વિશે પણ વિચાર કરી રહ્યું છે. આ ઉપરાંત હાઇપરસોનિક મિસાઇલોની ખરીદીને લઇને પણ અમેરિકા સાથે વાત કરવાની તૈયારી છે.ઉલ્લેખનીય છે કે એશિયા-પ્રશાંત ક્ષેત્રમાં ઑસ્ટ્રેલિયાનું સૌથી મોટું મદદગાર અમેરિકા છે અને તે પહેલાથી જ ચીનથી ઘણું નારાજ છે.
વિસ્તારવાદી નીતિ સામે હવે તૈયાર રહેવાની જરૂરી
બુધવારનાં ઑસ્ટ્રેલિયાઈ પીએમએ ભારત-ચીન સરહદ વિવાદનો ઉલ્લેખ કરતા કહ્યું કે, “કેટલાક દેશ વિસ્તારવાદી નીતિ અપનાવી રહ્યા છે જેના માટે હવે તૈયાર રહેવાની જરૂરિયાત છે.” ઑસ્ટ્રેલિયાનાં વડાપ્રધાન સ્કૉટ મોરિસને કહ્યું કે, “દક્ષિણ ચીન સાગર અને પૂર્વ ચીન સાગરમાં સતત તણાવ વધી રહ્યો છે.હિન્દ-પ્રશાંત વિસ્તાર વધતા વ્યૂહાત્મક સ્પર્ધાનું કેન્દ્ર છે,જ્યારે ઑસ્ટ્રેલિયા ખુલ્લું અને સ્વતંત્ર ઇન્ડો-પેસિફિક ક્ષેત્ર ઇચ્છે છે જેની રક્ષા કરવાની રહેશે.” ઉલ્લેખનીય છે કે કોરોના વાયરસને લઇને ઑસ્ટ્રેલિયાનાં સવાલોથી નારાજ ચીને આર્થિક રીતે ગાળિયો કસવાનું શરૂ કર્યું છે. તાજેતરમાં જ ચીની સરકારે પોતાના નાગરિકોને ઑસ્ટ્રેલિયા ના જવાની સલાહ જાહેર કરી હતી.એટલું જ નહીં,ચીને ઑસ્ટ્રેલિયાથી આયાત થતા અનેક સામાન પર પ્રતિબંધ લગાવી દીધો છે.
