નવી દિલ્હી : ચાલુ વર્ષે ઓછામાં ઓછા ૮,૦૦૦‘સુપર રિચ’અથવા અતિસમૃદ્ધ લોકો ભારતમાંથી સ્થળાંતર કરશે એવો અંદાજ એક અભ્યાસમાં રજૂ કરાયો છે.હેન્લી ગ્લોબલ સિટિઝન્સ રિપોર્ટમાં જણાવ્યા અનુસાર સ્થળાંતરનું મુખ્ય કારણ વધુ વિકસિત દેશનો પાસપોર્ટ મેળવવાની ઇચ્છા છે.હેન્લી ગ્લોબલ સિટિઝન્સ રિપોર્ટ વિશ્વભરમાં ધનાઢ્યોની સંપત્તિ અને રોકાણના સ્થળાંતર અંગેના ટ્રેન્ડ પર નજર રાખે છે.
અહેવાલમાં જણાવ્યા અનુસાર ટેક્નોલોજી ક્ષેત્રના યુવા ઉદ્યોગ સાહસિકોમાં બિઝનેસ અને રોકાણની વૈશ્વિક તકોનો લાભ લેવા માટે દેશ બદલવાનું પ્રમાણ વધી રહ્યું છે.અહેવાલમાં રજૂ કરાયેલા અન્ય એક અભ્યાસ મુજબ ભારતમાં અમેરિકન ડોલરની રીતે લખપતિ અને અબજપતિઓની સંખ્યા આગામી ૧૦ વર્ષમાં ૮૦ ટકા વધશે.સમાન ગાળામાં અમેરિકામાં આ આંકડો માત્ર ૨૦ ટકા તેમજ ફ્રાન્સ,જર્મની,ઇટલી અને બ્રિટનમાં ૧૦ ટકા રહેવાનો અંદાજ છે.જોકે,અમેરિકન ડોલરની રીતે ભારતમાં લખપતિઓની ચોખ્ખી આવક અને જાવક(ભારતમાં આવનાર અને ભારત બહાર જનારા‘સુપર રિચ’વચ્ચેનો તફાવત)ના ૨૦૨૨ના તાજેતરના અંદાજમાં ચાલુ વર્ષે ભારતને લગભગ ૮,૦૦૦નું ચોખ્ખું નુકસાન થશે.
અહેવાલમાં જણાવાયું છે કે,“ભારત માટે આ નુકસાન બહુ ચિંતાજનક નથી.કારણ કે દેશ દર વર્ષે સ્થળાંતરને કારણે જેટલા ધનાઢ્યો ગુમાવે છે તેની તુલનામાં ભારતમાં મોટી સંખ્યામાં નવા લખપતિઓ બને છે.ઉપરાંત, સમૃદ્ધ લોકો ભારત પરત ફરી રહ્યા હોવાનો પણ ટ્રેન્ડ જોવા મળી રહ્યો છે.આગામી સમયમાં દેશના જીવન ધોરણમાં વધુ સુધારો નોંધાશે તો અમારા અંદાજ પ્રમાણે સંપત્તિવાન લોકો મોટી સંખ્યામાં દેશ પરત ફરશે.ન્યૂ વર્લ્ડ વેલ્થના રિસર્ચ હેડ એન્ડ્રુ એમોલિસે જણાવ્યું હતું કે,“ભારત માટે સંપત્તિના અંદાજ ઘણા મજબૂત છે.૨૦૩૧ સુધીમાં દેશમાં હાઇ નેટવર્થ ઇન્ડિવિજ્યુઅલ્સ અથવા અતિધનાઢ્ય લોકોની સંખ્યા ૮૦ ટકા વધશે.તે ભારતને વિશ્વનું સૌથી વધુ ઝડપે વધતું ‘વેલ્થ માર્કેટ’ બનાવશે.
