ભાવનગર : શહેરના ચિત્રા જીઆઈડીસી વિસ્તારમાંથી વહેલી સવારે સરકારી અનાજનો જથ્થો ભરેલો ટ્રક બિનવારસી હાલતમાં મળી આવતા પુરવઠા વિભાગની ટીમ દોડી ગઈ હતી અને ટ્રકને કબજે કરી પંચરોજ કામ, નિવેદનો લેવા સહિતની કાર્યવાહી હાથ ધરી હતી. કોન્ટ્રાક્ટરના નિવેદનમાં સરકારી અનાજ ભરેલા ટ્રકની ચોરી થઈ હોય અને આ અંગે પોલીસને જાણ કરાઈ હોવાનું પણ પ્રાથમિક તપાસમાં બહાર આવ્યું છે.ભાવનગરમાં ગરીબોના પેટનું અન્ન છીનવી સરકારી અનાજનો બારોબાર વેપલો કરવાની ઘટના છાશવારે સામે આવતી રહી છે. હજુ તાજેતરમાં જ સરકારી અનાજનો મસમોટો ઝડપાયા બાદ આજે શુક્રવારે વહેલી સવારે શહેરના ચિત્રા જીઆઈડીસી વિસ્તારમાંથી ચોખાનો મોટો જથ્થો ભરેલો ટ્રક બિનવારસી હાલતમાં મળી આવ્યો હતો.એફસીઆઈમાંથી ભાવનગર સ્થિત ગોડાઉન માટે મોકલવામાં આવેલો ચોખા ભરેલો ટ્રક ચિત્રા જીઆઈડીસીમાં બિનવારસી પડયો હોવાની જિલ્લા પુરવઠા વિભાગને માહિતી મળતા જ પુરવઠાની ટીમ તાત્કાલિક સ્થળ પર દોડી થઈ હતી.પ્રથમ પંચરોજ કામ કરી ટ્રકનો કબજો લઈ સરકારી ગોડાઉનમાં જવાના બદલે ટ્રક અહીં કેવી રીતે પહોંચ્યો ? તે અંગેની તપાસ કરવા સપ્લાયનો કોન્ટ્રાક્ટર રાખનાર કોન્ટ્રાક્ટરના નિવેદન લેવાયા હતા.જેમાં કોન્ટ્રાક્ટરે તેનો ટ્રક ચોરી થઈ ગયો હોવા અંગે પોલીસમાં જાણ કરી હોવાનું કેફિયત આપી હતી.જેથી કોન્ટ્રાક્ટર પાસે અરજીની નકલ મંગાવવામાં આવી હતી.આ ઉપરાંત પુરવઠા વિભાગ દ્વારા ગોડાઉન મેનેજરના પણ નિવેદન નોંધાવામાં આવ્યા હતા.અનાજ ભરેલો ટ્રક બિનવારસી હાલતમાં મડી આવ્યાની ઘટનાને લઈ મોડી સાંજ સુધી પંચરોજ કામ, નિવેદન નોંધવા સહિતની કાર્યવાહી શરૂ હોવાનું ઈન્ચાર્જ પુરવઠા અધિકારી જનકાટએ જણાવ્યું હતું.
ફુડ કોર્પોરેશન ઓફ ઈન્ડિયામાંથી આવી રહેલો ચોખાનો સરકારી અનાજનો જથ્થો ચિત્રા જીઆઈડીસીમાં આવેલી પેઢીમાં ખાલી કરવાનો હોવાની આમ આદમી પાર્ટીને રાતથી જ માહિતી મળી હતી.જેથી આપના કાર્યકરો રાત્રિથી વોચમાં ગોઠવાઈ ગયા હતા.દરમિયાનમાં વહેલી સવારે ૪-૩૦ કલાકે સરકારી અનાજ ભરેલો ટ્રક પેઢીમાં ચિત્રા જીઆઈડીસીમાં તારાચંદ પેઢી પાસે પહોંચતા જોગાનુજોગ પંચર પડી ગયું હતું. જેથી આપના કાર્યકરોએ દોડી જઈ ડ્રાઈવરને પૃચ્છા કરતા ચાલક ટ્રકને બિનવારસી હાલતમાં મુકીને નાસી ગયો હતો. બાદમાં પુરવઠા વિભાગને સમગ્ર ઘટનાની જાણ કરાઈ હતી.આ અનાજનો જથ્થો બારોબાર પગ કરવા-કરાવવા પાછળ કયાં મગરમચ્છોનો હાથ છે ? તેની પોલીસ અને પુરવઠા વિભાગ દ્વારા ઉંડાણપૂર્વક તપાસ કરવામાં આવે તેવી આ૫ના શહેર પ્રમુખ મહિપતસિંહે જણાવ્યું છે.
