ગુજરાતમાં વિધાનસભાની ચૂંટણી માટે પોલીસ વિભાગની તૈયારીઓ શરૂ થઈ ચૂકી છે.ત્રણ વર્ષથી એક જ જગ્યાએ રહેલા PI- PSIની બદલી કરવા DGP આશિષ ભાટિયાએ આદેશ આપી દીધો છે.રાજ્યના પોલીસ વડાએ તમામ પોલીસ કમિશ્નર અને તમામ જિલ્લાના પોલીસ વડાને ચૂંટણી પંચની સૂચનાના અનુસંધાને પરિપત્ર પાઠવ્યો છે.અપાયેલી સુચનાના પાલન અંગે ડીજીપી કચેરીને યાદી સોંપવા અને રિપોર્ટ કરવા જણાવાયુ છે.
ડીજીપીના પત્રમાં જણાવાયું છે કે, આગામી સમયમાં વિધાનસભા સામાન્ય ચૂંટણી – ૨૦૨૨ યોજાનાર છે.જે ચૂંટણી સંદર્ભે આચારસંહિતાના અમલ માટે સુચનાઓ આપવામાં આવે છે.જેમાં જો કોઇ પોલીસ સબ ઇન્સ્પેકટરો (બિનહથિયારી) તા.૨૮ / ૦૨ / ૨૦૧૩ ની સ્થિતિએ છેલ્લા ચાર વર્ષમાં ત્રણ વર્ષથી જે તે પોલીસ સબ ડીવીઝનમાં ફરજ બજાવતા હોય તો તેઓની એક પોલીસ સબ ડીવીઝન માંથી અન્ય વિધાનસભા મત વિસ્તારમાં આવતા પોલીસ સબ ડીવીઝનમાં બદલી કરવાની રહે છે.જો જીલ્લાના નાના ક્ષેત્રને કારણે આમ કરવું શકય ન હોય તો,તેઓની અન્ય જીલ્લા ખાતે બદલી કરવાની રહે છે.આમ તાત્કાલિક બદલી કરી અને કરેલ કાર્યવાહીનું પત્રક તૈયાર કરી ડીજીપી કચેરી ખાતે મોકલી આપવા સૂચના કરાઈ છે.બદલી કરવી જરૂરી હોઇ તેવા અધિકારીઓનું પત્રક તૈયાર કરી અન્ય જીલ્લા ખાતે બદલી કરવા સારૂ મોકલી આપવાનું કહેવાયુ છે.
વધુમાં સૂચના કરાઈ છે કે, આગામી છ માસમાં નિવૃત થનાર અધિકારીની જીલ્લા બદલી કરવાની રહેતી નથી,પરંતુ જો તે અધિકારીને હોદ્દાની રૂએ ચૂંટણી ફરજ બજાવવાની રહેતી હોય તો,તેઓની અનિવાર્યપણે અન્યત્ર આંતરિક બદલી કરવાની રહેશે અને તેમને ચૂંટણીલક્ષી કામગીરી ચૂંટણી દરમ્યાન સોંપવાની રહેશે નહીં.જે અધિકારીઓ સામે, ફોજદારી ધારા હેઠળ ગુનો નોંધાયેલ હોય તે કેસ ન્યાય અને નિર્ણયાર્થે કોઇ પણ અદાલતમાં વિચારાધિન હોય તેવા અધિકારીઓને ચૂંટણી સંબધી કામગીરી સુપ્રત કરવી નહીં,તેમ ચૂંટણી આયોગ દ્વારા જણાવવામાં આવેલ છે.આ પ્રકારના અધિકારીઓ જો હાલ ચૂંટણી કામગીરી સાથે પ્રત્યક્ષ કે પરોક્ષ રીતે સંકળાયેલ હોય તો તેમની અચૂક બદલી કરવા આદેશ કરાયો છે.આ અગાઉની ચૂંટણીઓમાં જે અધિકારીઓની બદલી ચૂંટણી આયોગના આદેશ અન્વયે કરવામાં આવેલ હોય પરંતુ તેવા અધિકારીઓ સામે જો શિસ્ત વિષયક પગલાં લેવા માટે આયોગે ભલામણ કરેલ ન હોય તેવા અધિકારીઓને ચૂંટણી સંબંધી કામગીરી સુપરત કરી શકાશે.પરંતુ જે અધિકારીના કિસ્સામાં ચૂંટણી આયોગે શિસ્ત વિષયક કાર્યવાહી કરવા ભલામણ કરી તેવા અધિકારીઓની નિઃશંકપણે બદલી કરવાની રહેતી હોઇ આવા અધિકારીઓનું પત્રક તૈયાર કરી મોકલવા કહેવાયું છે.
પોલીસ સબ ઇન્સ્પેકટરો (બિન હથિયારી) જે તે વિધાનસભા મત વિસ્તારમાં છેલ્લા ચાર વર્ષમાં ત્રણ વર્ષથી વધુ સમય થયેલ તેમને અન્ય વિધાનસભા મત વિસ્તારમાં બદલીથી નિમણુક આપી આદર્શ આચારસંહિતાનો અમલ કરી શકાય છે.પણ પોતાના વતનમાં ફરજ બજાવતા પોલીસ અધિકારીઓની બદલી કરવા જણાવાયું છે.
