ચૂંટણીપંચે મદ્રાસ હાઈકોર્ટે કરેલી ટીપ્પણી સામે સુપ્રીમ કોર્ટમાં અરજી કરી હતી.એની સુનાવણી વખતે સુપ્રીમ કોર્ટે કહ્યું હતું કે મદ્રાસ હાઈકોર્ટની ટીપ્પણી કઠોર હતી એ ખરું,પરંતુ એ ચુકાદાનો ભાગ ન હોવાથી તેને દૂર કરવાનો આદેશ મદ્રાસ હાઈકોર્ટને આપી શકાય નહીં.એવી જ રીતે મીડિયા કવરેજ અટકાવવાની માગણી પણ સ્વીકારી શકાય નહીં.
મદ્રાસ હાઈકોર્ટે કોરોનાના સંદર્ભમાં એક સુનાવણી ચાલતી હતી એ વખતે પાંચ રાજ્યોમાં થયેલી ચૂંટણી કોરોનાના બીજા વેવ માટે કારણભૂત છે અને તેના માટે જવાબદાર ચૂંટણીપંચના અધિકારીઓ સામે હત્યાનો ગુનો દાખલ કરીને કેસ ચલાવવો જોઈએ એવી ટીપ્પણી કરી હતી.મદ્રાસ હોઈકોર્ટે કહ્યું હતું કે ચૂંટણીપંચ સ્વતંત્ર એજન્સી છે.તેની પાસે સત્તા છે.તેમ છતાં સત્તાનો ઉપયોગ કરીને નેતાઓની રેલીઓ અટકાવી નહીં.વળી, કોરોનાની ગાઈડલાઈનનું પણ પાલન થયું નહીં. એ માટે ચૂંટણીપંચ જવાબદાર છે.
આ ટીપ્પણીના વિરોધમાં ચૂંટણીપંચે મદ્રાસ હાઈકોર્ટ સામે સુપ્રીમમાં અરજી કરી હતી.એ અરજીની સુનાવણી વખતે સુપ્રીમે કહ્યું હતું કે મદ્રાસા હાઈકોર્ટનું નિવેદન ચુકાદાનો ભાગ નથી,તેથી તેને હટાવી દેવા માટે આદેશ આપી શકાય નહીં.સુપ્રીમ કોર્ટે માન્યું હતું કે મદ્રાસ હાઈકોર્ટની ટીપ્પણી કઠોર ચોક્કસ હતી.ન્યાયધીશોએ બિનજરૂરી નિરીક્ષણો રજૂ કરવાથી બચવું જોઈએ.આવી અયોગ્ય ટીપ્પણી કરવી અનુચિત છે.પરંતુ ચૂંટણીપંચને જે ટીપ્પણીથી વાંધો છે તે ટીપ્પણી ચુકાદાનો ભાગ નથી.
ચૂંટણીપંચે ટીપ્પણીઓનું મીડિયા કવરેજ અટકાવી દેવાની માગણી કરી હતી.એના સંદર્ભમાં સુપ્રીમ કોર્ટે કહ્યું હતું કે નાગરિકોનો અધિકાર છે કે કોર્ટે શું કહ્યું તે જાણી શકે.એવા સમયે મીડિયાની ભૂમિકા મહત્વની બની જાય છે.કોર્ટનું મીડિયા કવરેજ અટકાવવાની માગણી બિલકુલ યોગ્ય નથી.જો મીડિયા રીપોર્ટિંગ રોકી દેશે તો એમાં કોઈનું ભલું નથી.
સુપ્રીમ કોર્ટે ટકોર કરી હતી કે બે સંવૈધાનિક સંસ્થાઓ વચ્ચે સંતુલન બની રહે તે જરૂરી છે.એટલું જ જરૂરી છે મીડિયાની સ્વતંત્રતા.દુનિયાની કેટલીય કોર્ટોમાં લાઈવ સ્ટ્રીમિંગ થાય છે અને તેનું પ્રસારણ લોકો જુએ એવી વ્યવસ્થા થાય છે.ત્યારે કોર્ટના ચુકાદાથી અને ન્યાયધીશોના નિરીક્ષણોથી નાગરિકો માહિતગાર થાય છે.એ વખતે કોઈ ઓપિનિયન રજૂ કરવામાં આવે તો તેને અટકાવી શકાય નહીં.ન્યાયિક બેંચ દ્વારા સુનાવણી વખતે ઓપિનિયન આપવો તે કોર્ટની પ્રક્રિયાનો ખૂબ જ મહત્વનો હિસ્સો છે.તેને ચુકાદા સાથે સીધો સંબંધો હોતો નથી.સુપ્રીમ કોર્ટે નોંધપાત્ર ટીપ્પણી કરતા ઉમેર્યું હતું : મીડિયાને કોર્ટની કાર્યવાહીના સંદર્ભમાં ટીપ્પણી કરવાનો અને લખવાનો અધિકાર છે.સુપ્રીમ કોર્ટની સમજાવટ પછી ચૂંટણીપંચની એ અરજીનો નિકાલ થયો હતો.
