ગુજરાત વિધાનસભા ચૂંટણી 2022માં ભાજપનો રેકોર્ડ બ્રેક વિજય થયો છે.જાણે કે ગુજરાતમાં કેસરિયા આંધી ફૂંકાઈ હોય તેમ 154 બેઠકો પર ભાજપનો વિજય થયો છે.ગુજરાતમાં ભાજપના ઐતિહાસિક વિજયની સામે હિમાચલ પ્રદેશમાં ભાજપને મળેલી હારનું દુઃખ છૂપાઈ ગયું છે.આજે ગુજરાતના જ્વલંત વિજયને વધાવવા માટે વડાપ્રધાન નરેન્દ્ર મોદી દિલ્હી સ્થિત ભાજપના મુખ્ય કાર્યલાય ખાતે કાર્યકરો,પદાધિકારીઓ અને પક્ષના ટોચના નેતાઓ સાથે જીતના ઉત્સાહને વધાવવાના છે.તેમજ કાર્યકરોને સંબોધન કરવાના છે.
ગુજરાતમાં ભાજપનો જ્વલંત વિજય
ગુજરાતમાં અત્યારસુધી સૌથી વધુ 149 બેઠક જીતવાનો રેકોર્ડ કોંગ્રેસના માધવસિંહ સોલંકીના નામે હતો.નરેન્દ્ર મોદી 2002માં જ્યારે ચૂંટણી લડ્યા ત્યારે 127 બેઠકો મેળવી હતી અને તેમની ઇચ્છા હતી કે ગુજરાતમાં ભાજપ 150 કરતા વધુ બેઠકો પર વિજયી થાય.આ માટે ગુજરાતના પ્રદેશ અધ્યક્ષ સીઆર પાટીલ ઘણા લાંબા સમયથી પક્ષના કાર્યકરો સાથે બેઠકો કરીને બુથ લેવલ અને પેજ કમિટી સુધી સતત એક્ટિવ રહ્યાં.મુખ્યમંત્રી ભુપેન્દ્ર પટેલ પણ સતત વિવિધ સમાજના આગેવાનો સાથે બેઠકો કરતા અને અનેક સભાઓ કાર્યક્રમોમાં હાજરી આપીને કાર્યકર્તાઓનું મનોબળ મજબૂત કરી રહ્યાં હતા.બીજી તરફ નરેન્દ્ર મોદી પણ ચૂંટણી દરમિયાન ખૂબજ પ્રયાસો કરતા જોવા મળ્યા હતા જેના ફળ સ્વરૂપે આ વખતે ગુજરાતમાં ભાજપ જ્વલંત વિજય મેળવવામાં સફળ રહ્યું છે.
