જર્મનીની ફૂટવેર કંપની ચીનમાંથી ભારતમાં પ્લાન્ટ શિફ્ટ કરશે

-વોન વેલ્ક્સ બ્રાન્ડ ધરાવતી કંપની કાસા એવર્ઝ પ્રથમ તબક્કામાં ~110 કરોડનું રોકાણ કરશે

નવી દિલ્હી : જર્મનીની હેલ્ધી ફૂટવેર બ્રાન્ડ વોન વેલ્ક્સની માલિક કંપની કાસા એવર્ઝ ચીનમાંથી તેનો પ્લાન્ટ ભારતમાં શિફ્ટ કરશે.આ પ્લાન્ટની ક્ષમતા વાર્ષિક 30 લાખ જોડી જૂતા બનાવવાની છે.કંપની શરૂઆતમાં ભારતમાં આ ~110 કરોડનું રોકાણ કરશે તેમ તેની લાઈસન્સી કંપની લેટ્રિક ઈન્ડસ્ટ્રીઝ પ્રાઈવેટ લિમિટેડના ટોચના અધિકારીએ કહ્યું હતું.લેટ્રિક ઈન્ડસ્ટ્રીઝ સાથે જોડાણ દ્વારા આ જર્મન કંપની ઉત્તર પ્રદેશમાં 30 લાખ જોડી જૂતાનો નવો પ્લાન્ટ સ્થાપશે.આ માટે રાજ્ય સરકાર સાથે સમજૂતી થઈ ગઈ છે. લેટ્રિક ઈન્ડસ્ટ્રીઝના ડિરેક્ટર અને સીઈઓ આશીષ જૈને કહ્યું હતું કે “હા,અનેક રાઉન્ડ મંત્રણા થયા પછીથી કાસા એવર્ઝ જીએમબીએચે ચીનમાંથી તેનો સંપૂર્ણ પ્લાન્ટ ભારતમાં શિફ્ટ કરવાનો નિર્ણય લીધો છે.”

કાસા એવર્ઝ ચીનમાં બે પ્લાન્ટ ધરાવતી હતી,જે બન્નેની ઉત્પાદન ક્ષમતા વાર્ષિક 30 લાખ જોડી જૂતાની હતી. લેટ્રિક ઈન્ડસ્ટ્રીઝ કાસા માટે 5 લાખ જોડી જૂતાનાં ઉત્પાદનની ક્ષમતા તો ધરાવે જ છે.કાસાની બ્રાન્ડ વોન વેલ્ક્સ જર્મની મજબૂત બ્રાન્ડ છે જે બ્રાન્ડ હેઠળ 5 ઝોન મેન્સ અને વિમેન્સ શૂઝ બનાવશે.આ ઉપરાંત પણ અન્ય 5 લાખ જોડીની ક્ષમતા તે ધરાવે છે.

જૈને કહ્યું હતું કે હવે નવું યુનિટ સ્થાપવામાં આવશે જેની ક્ષમતા 30 લાખ જોડીની રહેશે.આ માટે જર્મન કંપનીએ તેમને 2 વર્ષનો સમય આપ્યો છે. ઉત્તર પ્રદેશ સરકારે આ માટે તમામ જરૂરી સહયોગની ખાતરી આપી છે.જર્મન કંપનીના રોકાણ અંગે પૂછવામાં આવતા તેમણે કહ્યું હતું કે પ્રથમ તબક્કામાં કાસા એવર્ઝ બે વર્ષમાં ~110 કરોડનું રોકાણ કરશે.બીજા તબક્કાનું પણ આયોજન છે, જેમાં એન્સિલરી ઈન્ડસ્ટ્રીઝ સ્થાપવામાં આવશે, જે ભારતમાં ન બનતા હોય તેવા હાઈ ક્વોલિટી રો મટીરિયલ (આઉટસોલ, સ્પેશિયલ ફેબ્રિક્સ અને કેમિકલ્સ)નું ઉત્પાદન કરશે.