સુરત, 04 જૂન : ચોમાસા દરમિયાન દક્ષિણ ગુજરાતમાં લેપ્ટોના પગપેસારાને રોકવા પૂર્વતૈયારીના ભાગરૂપે જિલ્લા વિકાસ અધિકારી હિતેશ કોયાના અધ્યક્ષસ્થાને ઇન્ટરડિપાર્ટમેન્ટ કો-ઓર્ડિનેશન કમિટી દ્વારા જિલ્લા પંચાયતના સભાખંડમાં લેપ્ટોસ્પાઇરોસિસ પ્રિવેન્શન અને કંટ્રોલની બેઠક યોજાઈ હતી.પ્રાદેશિક નાયબ નિયામક,હેલ્થ એન્ડ મેડિકલ સર્વિસીસમ સુરતના ઉપક્રમે આયોજિત આ બેઠકમાં આરોગ્ય વિભાગ,ગાંધીનગરના એડિશનલ ડાયરેક્ટર,એપિડેમિક વિભાગ,ગાંધીનગરના ઈ.ડેપ્યુટી ડાયરેક્ટર,ઓપ્થેલ્મિક વિભાગ,ગાંધીનગરના જોઇન્ટ ડિરેક્ટર ડો.ગિરીશ ઠાકર એ ખાસ ઉપસ્થિત રહી લેપ્ટોને અટકાવવા માટે પ્રેરક માર્ગદર્શકન આપ્યું હતું.બેઠકમાં જિલ્લા વિકાસ અધિકારી જણાવ્યું હતું કે,કોરોના સંકટ વચ્ચે લેપ્ટો સામે લડવા પેરામેડિકલ સ્ટાફ,આશા બહેનોને તાલીમ આપવા અને આરોગ્ય વિભાગની ખાલી જગ્યાઓ ભરવા માટે વિશેષ ધ્યાન કેન્દ્રિત કરવામાં આવશે.કોરોનાની પ્રવર્તમાન સ્થિતિમાં લેપ્ટો સામે પણ લડવા માટે આરોગ્ય તંત્ર સુસજ્જ છે.વર્ષ ૨૦૧૯માં લેપ્ટોના ૨૬ કેસો નોંધાયા હતા,ત્યારે આ વર્ષે પણ સાવચેતીના ભાગરૂપે સુરત જિલ્લામાં ફિવર સર્વેલન્સ શરૂ કરવામાં આવશે એમ જણાવી તેમણે કલોરીન,ડોક્સી મેડિસીનની ઉપલબ્ધતા વિષે વિગતો આપી હતી.
ઈ. ડેપ્યુટી ડાયરેક્ટર ડો.ઘનશ્યામભાઈ પટેલે ચોમાસા પહેલા લેપ્ટોસ્પાઇરોસિસના કેસોને અટકાવવા રાજ્યના આરોગ્ય વિભાગ દ્વારા પૂર્વ આયોજન કરવામાં આવ્યું હોવાનું જણાવી ઉમેર્યું કે,સામાન્ય રીતે લેપ્ટોસ્પાઇરોસિસના કેસો જુલાઇના અંતમાં અને ઓગસ્ટ મહિનાની શરૂઆતમાં જોવા મળતા હોય છે.નોન કોવિડ સ્મીમેર હોસ્પિટલમાં લેપ્ટો.ના સંભવિત કેસોની સારવાર કરવાની વ્યવસ્થા પણ કરાશે.એડિશનલ ડાયરેક્ટર ડો.પ્રકાશભાઈ વાઘેલાએ જણાવ્યું હતું કે, પ્રવર્તમાન કોરોના વાઈરસ એક ગંભીર બીમારી છે,જેની સામે સામે લડવામાં આરોગ્ય કર્મીઓની જોતરાયેલા છે,ત્યારે કોરોનાની સાથે લેપ્ટોને અટકાવવા માટે પણ અત્યારથી જ સાવધાની રાખવામાં આવી રહી છે.સામાન્ય રીતે ચોમાસામાં લેપ્ટોસ્પાઇરોસિસ નામના રોગ માથુ ઉચકે છે, જેથી ચોમાસાના આગમન પહેલાં પૂર્વતૈયારીના ભાગરૂપે આરોગ્યલક્ષી કામગીરી પણ બાકી ન રહી જાય તે માટે સમયોચિત બેઠક કરી જરૂરી સાવધાની અને સતર્કતાના ભાગરૂપે આરોગ્ય વિભાગને સજ્જ કરવામાં આવ્યું છે.બેઠકમાં મુખ્ય જિલ્લા આરોગ્ય અધિકારી ડો.હસમુખ ચૌધરી,જિલ્લા ખેતીવાડી અધિકારી તેમજ દક્ષિણ ગુજરાતના આરોગ્યના અધિકારીઓ,ખેતીવાડી અધિકારીઓ,જિલ્લા પંચાયતના અધિકારીઓ-કર્મચારીઓ ઉપસ્થિત રહ્યા હતા.
