– ડોક્ટર ગોવિંદ નંદકુમાર બેંગ્લોર ખાતેની મણિપાલ હોસ્પિટલમાં ગેસ્ટ્રોએન્ટોલોજીના સર્જન છે
– બેંગ્લોરમાં છેલ્લા કેટલાક દિવસ પહેલા થયેલા ભારે વરસાદથી લોકો ત્રાહિમામ
બેંગ્લોર, તા. 12 સપ્ટેમ્બર 2022, સોમવાર : બેંગ્લોર શહેર છેલ્લા કેટલાક દિવસથી ખૂબ જ ચર્ચામાં છે. ભારતની ‘સિલિકોન વેલી’ તરીકે જાણીતા આ શહેરમાં છેલ્લા કેટલાક દિવસોમાં ધોધમાર વરસાદ વરસ્યો હતો.તેથી બેંગ્લોરના અનેક વિસ્તારોમાં પાણી ભરાઈ ગયું હતું.ભારે વરસાદના કારણે ઠેર ઠેર પાણી ભરાવાને કારણે લોકોને ભારે હાલાકીનો સામનો કરવો પડ્યો હતો.જો કે હવે સ્થિતિ થોડી સુધરી છે પરંતુ હજુ પણ બેંગ્લોરના કેટલાક વિસ્તારોમાં ટ્રાફિક જામ જોવા મળી રહ્યો છે.આ ટ્રાફિક જામમાં બેંગ્લોરના એક ડોક્ટર પણ ફસાઈ ગયા હતા.ટ્રાફિકમાં ફસાયેલા આ સર્જને સમયસર સર્જરી કરવા માટે થઈને પોતાની ગાડીને પડતી મૂકીને રસ્તા ઉપર દોડીને હોસ્પિટલ જવાનું પસંદ કર્યું હતું.
ડોક્ટર ગોવિંદ નંદકુમાર બેંગ્લોર ખાતેની મણિપાલ હોસ્પિટલમાં ગેસ્ટ્રોએન્ટોલોજીના સર્જન છે.તેમને 30 ઓગસ્ટના રોજ એક મહિલા પેશન્ટની ઈમરજન્સી લૈપ્રોસ્કોપિક ગોલબ્લૈડર સર્જરી કરવાની હતી.તેઓ પોતાના ઘરેથી સમયસર નીકળ્યા હતા પરંતુ રસ્તામાં સરજાપુર-મારાથલ્લીની વચ્ચે ટ્રાફિક જામ હોવાથી તેઓ તેમાં ફસાયા હતા.તેમની ટીમ હોસ્પિટલમાં પેશન્ટના ઓપરેશનની તૈયારી કરી ચૂકી હતી પરંતુ ડોક્ટરને રસ્તામાં ખૂબ જ લાંબો ટ્રાફિક જામ જોવા મળ્યો હતો.તેથી તેમણે પોતાનું વાહન છોડીને દોડીને હોસ્પિટલ જવાનો નિર્ણય કર્યો હતો.
સર્જરી સમયસર થાય તે જરૂરી હતુ
ડોક્ટર ઘણા સમયથી ટ્રાફિક જામમાં ફસાયેલા હતા. તેમના મહિલા દર્દીનું ઓપરેશન સમયસર થાય તે જરૂરી હતું.પેશન્ટને શસ્ત્રક્રિયા પૂરી ન થાય ત્યાં સુધી ભોજન લેવાની મંજૂરી નહોતી.ડોક્ટર વધુ સમય બગાડવા માંગતા નહોતા કારણ કે, જો સર્જરીમાં મોડુ થાત તો પેશન્ટની તબિયત બગડી શકે તેવી શક્યતા હતી. તેથી આગળ પેશન્ટને વધુ મુશ્કેલીઓનો સામનો કરવો પડત.આ બધી બાબતોના કારણે તેઓ ચિંતિત હતા તેથી તેઓ ટ્રાફિક જામ હટે ત્યાં સુધી રાહ જોવા માંગતા નહોતા.
ટ્રાફિક જામના કારણે 3 Km સુધી દોડ્યા
ડોક્ટર ગોવિંદ 3 Km સુધી દોડ્યા હતા. તેમણે કહ્યું હતું કે, તેઓ સરજાપુરથી કનિંગહામ રોડ ઉપર આવેલી મણિપાલ હોસ્પિટલ સુધી દોડ્યા હતા.ભારે વરસાદના કારણે હોસ્પિટલથી થોડા કિલોમીટર આગળ ટ્રાફિક જામ થઈ ગયો હતો.ડોક્ટરે જણાવ્યું હતું કે, હું મારા પેશન્ટને રાહ જોવડાવવા માંગતા નહોતો.મારી ટીમ પણ ઓપરેશન કરવા માટે તૈયાર હતી અને તેઓ મારી રાહ જોઈ રહ્યા હતા.હું ઘરેથી સમયસર નીકળ્યો હતો પરંતુ રસ્તામાં ખૂબ જ ટ્રાફિક જામ હોવાથી મેં મારી ગાડીને ત્યાં જ મૂકીને દોડીને જવાનો નિર્ણય કર્યો હતો.તેમણે આગળ જણાવ્યું હતું કે, મારી પાસે ડ્રાઈવર હોવાથી હું ગાડી છોડી શકું તેમ હતો.હું દરરોજ જીમ જતો હોવાથી મારા માટે દોડવું સરળ હતું.તેથી હું 3 Km સુધી દોડી શક્યો અને સર્જરીના સમય સુધી હોસ્પિટલ પહોંચી શક્યો.
સમયસર થઈ સર્જરી
ડોક્ટર ગોવિંદ સમયસર હોસ્પિટલ પહોચી ગયા હતા. તેમના ઓપરેશન થિયેટરમાં પહોચ્યા બાદ તરત જ તેમની ટીમે દર્દીને એનેસ્થેસિયા આપી દીધું હતું.તેમણે સમયસર મહિલાનું ઓપરેશન પણ કર્યું હતું અને આ ઓપરેશન સફળ પણ રહ્યું હતું.ડોક્ટર ગોવિંદે જણાવ્યું હતું કે, આ પ્રથમ વખત નથી કે મેં આવી પરિસ્થિતિનો સામનો કર્યો હોય.અમારી હોસ્પિટલમાં દર્દીની સારી રીતે સંભાળ રાખવા માટે પૂરતો સ્ટાફ અને ઈન્ફ્રાસ્ટ્રકર હોવાથી હું ચિંતિત નથી થતો.આ પરિસ્થિતિ નાની હોસ્પિટલો માટે પણ સમાન ન પણ હોઈ શકે.તેમણે વધુમાં કહ્યું હતું કે, દર્દી અને તેનો પરિવાર ડોક્ટરની રાહ જોઈને બેચેની અનુભવતો હોય છે.જો કોઈ દર્દી એમ્બ્યુલનસમાં ફસાયેલો હોય તો શું થાય? ત્યાં એમ્બ્યુલન્સ પણ પસાર થાય તેટલી જગ્યા નહોતી.
ભારે વરસાદના કારણે બેંગ્લોરમાં ફરી એકવાર જળપ્રલય જેવી સ્થિતિ સર્જાઈ હતી.તેથી લોકોમાં શહેરમાં ખોટી રીતે સંચાલિત માળખાકીય સુવિધાઓ સામે આક્રોશ જોવા મળ્યો હતો.
