જો બાઇડેને ભારતીય મૂળના ડો. આરતી પ્રભાકરની વૈજ્ઞાનિક સલાહકાર તરીકે પસંદગી કરી

વોશિંગ્ટન : અમેરિકાના રાષ્ટ્રપતિ જો બાઇડેને મૂળ ભારતીય અમેરિકન વૈજ્ઞાનિક ડૉ.આરતી પ્રભાકરને દેશના વિજ્ઞાન અને ટેક્નોલોજી પોલિસી(OSTP)ના કાર્યાલયના ડિરેક્ટર તરીકે નિયુક્ત કર્યા છે.બાઇડેનની દરખાસ્તને જો સેનેટ દ્વારા મંજૂરી અપાશે તો ડૉ.આરતી પ્રભાકર OSTPના ડિરેક્ટરનું પદ સંભાળનાર પ્રથમ મહિલા હશે.અમેરિકન પ્રમુખે મંગળવારે જણાવ્યું હતું કે “ડૉ.પ્રભાકર એક વિદ્વાન અને આદરણીય એન્જિનિયર તથા ભૌતિકશાસ્ત્રી છે અને તેઓ વિજ્ઞાન,ટેક્નોલોજી અને નવિનીકરણનો લાભ લઈને આ ક્ષેત્રોમાં અમારી શક્યતાઓને વિસ્તારવા,અમારા મુશ્કેલ પડકારોને ઉકેલવા અને અશક્યને શક્ય બનાવવા માટે વિજ્ઞાન અને ટેક્નોલોજી નીતિ ઘડવામાં કાર્યાલયનું નેતૃત્વ કરશે.”બાઇડેને કહ્યું,“હું ડૉ.પ્રભાકરના એ વિશ્વાસ સાથે સંમત છું કે અમેરિકા પાસે વિશ્વમાં અત્યાર સુધીની સૌથી શક્તિશાળી ઇનોવેશન મશીનરી છે.સેનેટ તેમના નામાંકન પર વિચાર કરશે.હું આભારી છું કે ડૉ.એલોન્ડ્રા નેલ્સન OSTPનું નેતૃત્વ કરવાનું તથા ડૉ.ફ્રાન્સિસ કોલિન્સ મારા કાર્યકારી વિજ્ઞાન સલાહકાર તરીકે સેવા આપવાનું ચાલુ રાખશે.”