(PTI) નવી દિલ્હી, તા. ૧૪ : સરકારે ટેક્સટાઇલ સેક્ટર માટે પ્રોડક્શન લિંક્ડ ઇન્સેન્ટીવ(પીએલઆઇ) યોજના હેઠળ ગિન્ની ફિલામેન્ટ્સ,કિમ્બલી કલાર્ક ઇન્ડિયા પ્રાઇવેટ લિમિટેડ અને અરવિંદ લિમિટેડ સહિત વિવિધ કંપનીઓના ૬૧ પ્રસ્તાવોને મંજૂરી આપી છે.આનાથી ૧૯૦૦૦ કરોડ રૃપિયાથી વધુનું રોકાણ આવવાની આશા છે.ટેક્સટાઇલ સચિવ યુ પી સિંહાએ પત્રકારોને જણાવ્યું હતું કે આ સેક્ટરમાં પીએલઆઇ યોજના હેઠળ ૬૭ પ્રસ્તાવો મળ્યા હતાં જેમાંથી ૬૧ને મંજૂરી આપવામાં આવી હતી. જે પ્રસ્તાવોને મંજૂરી આપવામાં આવી છે તેમાંથી ૧૯,૦૦૦ કરોડ રૃપિયાનું રોકાણ આવવાની આશા છે.આનાથી ૧,૮૪,૯૧૭ કરોડ રૃપિયાનું ટર્નઓવર થવાનો અંદાજ છે ને ૨,૪૦,૧૩૪ લોકોને રોજગારી મળવાની આશા છે.
સરકારે દેશની મેન્યુફેકચરિંગ ક્ષમતા અને નિકાસ વધારવા માટે પાંચ વર્ષથી વધુ સમયમાં ૧૦,૬૮૩ કરોડ રૃપિયાના નાણાકીય ખર્ચની સાથે એમએમએફ એપર્લ, એમએમએફ ફેબ્રિક્સ અને ટેકનિકલ ટેક્સટાઇલ સહિત ટેક્સટાઇલ ક્ષેત્ર માટે પીએલઆઇ યોજનાને મંજૂરી આપી છે.અધિકારીઓએ જણાવ્યું હતું કે ૬૭ પ્રસ્તાવોમાંથી ૧૫ પાર્ટ-૧ હેઠળ અને બાકીના ૫૨ પાર્ટ-૨ હેઠળ મળ્યા હતાં. પાર્ટ-૧માં લઘુતમ ૩૦૦ કરોડ રૃપિયાના રોકાણની જરૃર છે અને પ્રોત્સાહન માટે ઓછામાં ઓછા ૬૦૦ કરોડ રૃપિયાના કારોબારીની જરૃર છે.જ્યારે બીજા તબક્કામાં લઘુતમ રોકાણ ૧૦૦ કરોડ રૃપિયા અને લઘુતમ બિઝનેસ ૨૦૦ કરોડ રૃપિયાનું હોવું જોઇએ.
