અફઘાનિસ્તાન પર કબજા બાદ તાલિબાને ભલે સરકાર બનાવી લીધી હોય પરંતુ પંજશીર પ્રાંતના યોદ્ધાઓએ હાર નથી માની.નેશનલ રેજિસ્ટેન્સ ફ્રંટ (NRF) દ્વારા તેઓ અફઘાનિસ્તાનમાં સમાંતર સરકાર ચલાવશે અને તાલિબાનની સરકારને નહીં માને તેવી જાહેરાત કરવામાં આવી છે.
પંજશીર અફઘાનિસ્તાનનું એકમાત્ર એવું પ્રાંત છે જ્યાં તાલિબાન સંપૂર્ણપણે કબજો નથી જમાવી શક્યું
ઉલ્લેખનીય છે કે, પંજશીર અફઘાનિસ્તાનનું એકમાત્ર એવું પ્રાંત છે જ્યાં તાલિબાન સંપૂર્ણપણે કબજો નથી જમાવી શક્યું.તાલિબાને પંજશીરના કેટલાક વિસ્તારોમાં કબજો જમાવ્યો હતો પરંતુ પંજશીરના ફાઈટર્સે હજુ હાર નથી માની અને તેઓ પહાડીઓ પરથી તાલિબાનીઓ પર હુમલો કરી રહ્યા છે.
તાલિબાને મંગળવારે રાતે પોતાની નવી કેબિનેટની જાહેરાત કરી
નેશનલ રેજિસ્ટેન્સ ફ્રંટ (NRF) જે નોર્ધન એલાયન્સ તરીકે પણ ઓળખાય છે તેની આગેવાની અહમદ મસૂદ કરી રહ્યા છે.તાલિબાને મંગળવારે રાતે પોતાની નવી કેબિનેટની જાહેરાત કરી હતી.તે અંગે પ્રતિક્રિયા આપતા અહમદ મસૂદે જાહેરાત કરી છે કે, તે લોકો અફઘાનિસ્તાનમાં સમાંતર સરકાર ચલાવશે. આ માટે હાલ નેતાઓ સાથે વિચાર-વિમર્શ પણ ચાલી રહ્યો છે.
NRFએ તાલિબાનની કેરટેકર સરકારને ગેરકાયદેસર અને અફઘાની લોકો સાથે દુશ્મની કાઢનારી ગણાવી છે.તાલિબાને મંગળવારે સાંજે 33 સદસ્યોવાળી કેરટેકર સરકારની જાહેરાત કરી હતી.તેમાં મુલ્લા હસન અખુંદને સરકારનો પ્રમુખ બનાવવામાં આવ્યો છે. NRFએ પોતાના નિવેદનમાં તાલિબાનને અફઘાનિસ્તાનની સાથે સાથે સમગ્ર વિશ્વ માટે જોખમી ગણાવ્યું છે.અગાઉ નોર્ધન એલાયન્સે સંયુક્ત રાષ્ટ્ર (UN), સંયુક્ત રાષ્ટ્ર માનવાધિકાર પરિષદ (UNHRC), ઈયુ, સાર્ક, OIC વગેરે સંસ્થાઓને વિનંતી કરી હતી કે તે લોકો તાલિબાનને કોઈ પણ પ્રકારનો સહયોગ ન આપે.
અફઘાન સરકારમાં મંત્રી રહી ચુકેલા સલાહુદ્દીન રબ્બાનીએ પણ તાલિબાન દ્વારા ગઠિત સરકારની નિંદા કરી હતી. તેમણે આ સરકાર વધુ દિવસો સુધી નહીં ચાલે તેવો દાવો કર્યો હતો.
તાલિબાન સરકારમાં આતંકવાદીઓની ભરમાર
તાલિબાને જે સરકારની રચના કરી છે તેમાં આતંકવાદીઓની ભરમાર છે. તેમાં કોઈક તસ્કરી માટે પ્રતિબંધિત છે તો કોઈના માથે 73 કરોડનું ઈનામ રાખવામાં આવેલું છે.સાથે જ તાલિબાને 33 મંત્રીઓવાળી કેબિનેટમાં એક પણ મહિલાને સ્થાન નથી આપ્યું.
