– બુટલેગરે પોલીસને કારમાં અડધો કિલોમીટર સુધી લટકાવી કાર હંકારીઃ પોલીસ કર્મીઓને લાકડીથી માર પણ મારવામાં આવ્યો
અમદાવાદ, તા. 04 જાન્યુઆરી 2023, બુધવાર : કણભા પોલીસ સ્ટેશનમાં પ્રોહિબીશનના ગુનામાં વોન્ટેડ આરોપીને બાતમીને આધારે દહેગામ-નરોડા રોડ આવેલા અણાસણ પાસે પકડવા માટે વોચમાં રહેતી પોલીસ પર નરોડાના કુખ્યાત બુટલેગર સત્યપ્રકાશ મેવાલાલે જીવલેણ હુમલો કર્યાની ચોંકાવનારી ઘટના બની છે.જેમાં પોલીસ કર્મીએ બુટલેગરની કારની ચાવી કાઢવા જતા બુટલેગરે અડધો કિલોમીટર સુધી કાર હંકારીને તેના સાગરિતોનો બોલાવીને માર્યો હતો.જેમાં ટ્રાફિક બ્રિગેડ જવાન અને એક પોલીસ કર્મચારીને ગંભીર ઇજાઓ થઇ હતી.જે અંગે કણભા પોલીસે ગુનો નોંધીને તપાસ શરૃ કરી છે.
આ બનાવની વિગતો એવી છે કે કણભા પોલીસ સ્ટેશનમાં ફરજ બજાવતા રામસીંભાઇ અને ટીઆરબી જવાન દિલિપ બારોટ એણાસણ પોલીસ ચોકી પર સોમવારે રાતના સમયે હાજર હતા ત્યારે બાતમી મળી હતી કે કણભા પોલીસ સ્ટેશનના પ્રોહિબિશનના ગુનામાં વોન્ટેડ બુટલેગર સત્યપ્રકાશ ઉર્ફે બાબુ મેવાલાલ સોની (રહે.નરોડા) તેની કારમાં દહેગામ-નરોડા રોડ પરથી પસાર થવાનો છે.જેના આધારે પોલીસે વોચ ગોઠવીને ચોક્કસ નંબરની કાર આવતા પોલીસે તેને રોકવા માટે ઇશારો કર્યો હતો.જો કે બુટલેગર સત્યપ્રકાશે કારને રોકવાને બદલે કારને પુરઝડપે હંકારી મુકી દીધી હતી.જેથી રામસીંહે અને સ્ટાફે પીછો કરીને કારને આંતરીને કારની ચાવી કાઢવાનો પ્રયાસ કર્યો હતો.પરંતુ, સત્યપ્રકાશે તેને મારી નાખવાની ધમકી આપીને કહ્યું હતું કે મેરે પર કાફી ગુને હે મુજે પકડને કી હિંમત નહી કરના…અને તેણે કારને પુરઝડપે ચલાવી હતી.આ સમયે રામસિંહનું ગળુ દરવાજામાં ફસાયુ હતું અને તેમના પગ નીચે હતા.લગભગ અડધો કિલોમીટર સુધી કાર ચલાવી હતી.આ સમયે ટીઆરબીએ કારનો પીછો પણ કર્યો હતો.આ દરમિયાન સત્યપ્રકાશે કારમાં હાજર મહિલાને કહ્યું કે ગીતા સાલે કો માર.. જેથી મહિલાએ રામસિંહના વાળ ખેંચીને માર માર્યો હતો. આ સમયે અન્ય કારમાં બે વ્યક્તિઓ આવ્યા હતા.તેમણે આવીને રામસિંહ અને ટીઆરબીને માર માર્યો હતો.આ સમયે સત્યપ્રકાશે કહ્યું હતું કે યોગેશ ઇસ પોલીસ વાલે કો આજ છોડના નહી..સાલે મેરે કો પકડને નીકલે હે..સાલે કો માર ડાલો… આ હુમલામાં બંનેને ગંભીર ઇજાઓ થઇ હતી.આ અંગે કણભા પોલીસે હત્યાની કોશિષનો ગુનો નોંધીને કાયદેસરની કાર્યવાહી હાથ ધરી છે.
