ભાવનગર : ગુજરાતના કેબિનેટ શિક્ષણ મંત્રી જીતુ વાઘાણીના નિવેદનને લઈને ગુજરાત નહિ પણ દેશમાં રાજકીય વાતાવરણ ગરમાયું છે જેને લઇને દિલ્હીના ડેપ્યુટી સીએમ મનીષ સિસોદિયા આજે ભાવનગરની મુલાકાતે આવ્યા હતા અને તેમણે ખાસ જીતુ વાઘાણીના મત વિસ્તારમાં આવેલી સરકારી શાળાઓના શિક્ષણ અને બાંધકામ અંગેની સમીક્ષા કરી હતી જે દરમિયાન તેમણે 27 વર્ષથી શાસન કરતાં ભાજપ પર આકરા પ્રહારો કર્યા હતા અને તેમણે કહ્યું હતું કે આગામી ચૂંટણીમાં શિક્ષણ અંગે ચર્ચાઓ થવી જોઈએ.
મનીષ સિસોદિયા ભાવનગરમાં શિક્ષણમંત્રી જિતુ વાઘાણીના મતવિસ્તારમાં હદાનગરમાં આવેલી સરકારી શાળા નંબર 62 મહાત્મા ગાંધી પ્રાથમિક શાળા અને સિદસર ખાતે આવેલી કેન્દ્રવતી શાળાની મુલાકાત લીધી હતી સરકારી શાળાની મુલાકાત લઈ મનીષ સિસોદિયાએ કહ્યું કે હું આવવાનો હતો એટલે સાફ-સફાઈ તો કરી છે પણ એટલી થઈ નથી, હદાનગરમાં આવેલી સરકારી શાળા નંબર 62ની મુલાકાત લઇ પત્રકારો સાથેની વાતચીતમાં જણાવ્યું હતું કે માત્ર એકાદ-બે LED લગાવી દેવાથી સ્માર્ટ શાળા બની જતી નથી. શાળામાં ગાબડાં પડી ગયાં છે, એ જર્જરિત છે.બાળકો ભયના ઓથાર નીચે જીવે છે, જેથી એને રિપેરિંગ કરાવવી જોઈએ અહીં આવીને મેં જોયું કે શિક્ષણ મંત્રીના મત વિસ્તારમાં જ શાળાઓની હાલત કેટલી ખરાબ છે.ભાવનગર શહેરની પ્રાથમિક શાળાઓની વાત કરીએ તો શહેરમાં 13 વોર્ડમાં કુલ 52 શાળાઓ આવેલી છે જેમાં ૨૫ હજાર બાળકો અભ્યાસ કરે છે સાથે જ 100 થી વધુ કાયમી શિક્ષકોની ઘટ છે, થોડા દિવસ પહેલાં મનીષ સિસોદિયાએ એક પ્રેસ-કોન્ફરન્સ દરમિયાન ગુજરાતના શિક્ષણમંત્રીના નિવેદનની નિંદા કરી હતી.ભાવનગરની મુલાકાતે આવી પહોંચેલા મનીષ સિસોદિયાએ પ્રદેશ અધ્યક્ષ ગોપાલ ઇટાલીયા તેમજ ઈશુદાન ગઢવી પણ જોડાયા હતા.
ગોપાલ ઇટાલીયાનો મનીષ સિસોદિયાને અંગૂલીનિર્દેશ
હાદાનગરની શાળા નંબર 62માં મુલાકાત લેતા મનીષ સીસોદીયાને ગોપાલ ઇટાલીયાએ બેસવાના બાકડા તરફ અંગુલી નિર્દેશ કર્યો હતો.આ બાકડા પર જીતુ વાઘાણી લખેલું હતુ.ગોપાલ ઇટાલીયાના અંગુલી નિર્દેશ પરથી જીતુભાઇ વાઘણીને ટાર્ગેટ કરવાની નીમ વ્યક્ત કરાઇ હોવાની ચર્ચા જાગી છે.
