નવી દિલ્હી : તા.25 મે 2022,બુધવાર : દિલ્હી પોલીસના સ્પેશિયલ સેલે આજે વહેલી સવારે નરેલા વિસ્તારમાં ભારે મોટી એક્શન લીધી હતી.પોલીસે સવારના સમયે એન્કાઉન્ટર દ્વારા જિતેન્દ્ર ગોગી-દીપક બોક્સર ગેંગના શાર્પશૂટર સંદીપને ઝડપી લીધો હતો.બંને તરફથી થયેલા ગોળીબારમાં શાર્પશૂટર સંદીપને પગમાં ગોળી વાગી છે અને તે ગંભીર રીતે ઘવાયો છે.હાલ પૂરતું કોઈ પોલીસકર્મીને ગોળી વાગ્યાની સૂચના નથી મળી.દિલ્હી પોલીસના કહેવા પ્રમાણે સ્પેશિયલ સેલે નરેલા ખાતે એન્કાઉન્ટર બાદ જિતેન્દ્ર ગોગી-દીપક બોક્સર ગેંગના શાર્પશૂટર સંદીપની ધરપકડ કરી લીધી છે.તેના પાસેથી એક સેમી ઓટોમેટિક પિસ્તોલ મળી આવી છે.જાણવા મળ્યા મુજબ ધરપકડ કરવામાં આવી છે તે આરોપી સંદીપ ઉર્ફે બસી વોન્ટેડ હતો અને 5થી વધારે જઘન્ય ગુનાઓમાં ફરાર હતો.તે પૈકીના એક સનસનીખેજ ગોળીબારમાં એક વ્યક્તિની હત્યા થઈ હતી.
ઉલ્લેખનીય છે કે,દિલ્હીમાં 5 દિવસ પહેલા પણ ગોળીબારના અવાજ સંભળાયા હતા.દિલ્હીના વજીરાબાદ વિસ્તારમાં સંક્ષિપ્ત અથડામણ બાદ એક આંતરરાષ્ટ્રીય ટોળકીના 3 સદસ્યોની ધરપકડ કરવામાં આવી હતી.ઝડપાયેલા ત્રણેય આરોપીઓ ટિલ્લુ તાજપુરિયા-પરવેશ માન અને નીરજ બવાના ટોળકીના શાર્પ શૂટર છે.તેઓ પોતાના પ્રતિદ્વંદીઓ અને તેમના પરિવારજનો પર એક મોટો હુમલો કરવા ષડયંત્ર રચી રહ્યા હતા.
