– અંદાજીત રૂપિયા 750 કરોડની ઉચાપત કરી હોવાનુ સામે આવ્યુ
– હાલ વિપુલ ચૌધરી અને તેમના સીએની ધરપકડ,પુછપરછ ચાલી રહી છે
અવારનવાર વિવાદોમાં આવતા વિપુલ ચૌધરીએ ફરી એકવખત દૂધ સાગર ડેરીમાં નાણાકીય ગોટાળા કર્યા હોવાનું સામે આવ્યું છે.જેને લઈને મહેસાણા એસીબીમાં ફરિયાદ નોંધાતા અધિકારીઓ દ્વારા આજરોજ તેમના નિવાસસ્થાનેથી વિપુલ ચૌધરીની અટકાયત કરવામાં આવી હતી. આ કૌભાંડનો આંકડો વધીને 700 કરોડ ઉપર પહોંચ્યો છે.ધી મહેસાણા જિલ્લા દુધ ઉત્પાદન સંઘ લીમિટેડ ગુજરાત સહકારી મંડળી અધિનિયમ 1961 અન્વયે ગુજરાત રાજ્ય સહકારી મંડળીઓની કચેરી ખાતે નોંધાયેલ સહકારી સંસ્થા છે. જે સામાન્ય રીતે દૂધ સાગર ડેરી તરીકે ઓળખાય છે.આ સંઘને ભારત સરકાર તથા ગુજરાત સરકાર દ્વારા વિવિધ કાર્યો માટે નાણાંકીય સહાય આપવામાં આવે છે.જેનો સરકાર દ્વારા નિર્ધારીત નિયમો અને માર્ગદર્શન મુજબ ઉપયોગ કરી સંઘે પોતાની કામગીરીને આગળ ધપાવવાની હોય છે.આ દૂધ સાગર ડેરીનો મુખ્ય ઉદ્દેશ દુધ ઉત્પાદન કરતા પશુપાલકોને તેમના ઉત્પાદનના બદલામાં યોગ્ય નાણાકીય વળતર મળી રહે અને આ દુધ તથા દૂધમાંથી અલગ-અલગ ચીજવસ્તુઓ બનાવી ગ્રાહકો સુધી પહોંચાડવાનું કામ કરી,જિલ્લાની મુખ્ય સહકારી સંસ્થા તરીકે ભૂમિકા નિભાવવાનો છે.
આ દૂધસાગર ડેરીની નાની મોટી પેટા ડેરીઓ,દુધ કોલ્ડ સ્ટોરેજ,પશુ સંવર્ધન કેન્દ્રો તેમજ ડેરી સાયન્સ કોલેજ કાર્યરત છે.ધી મહેસાણા જિલ્લા દુધ ઉત્પાદન સંઘ લી. (દુધસાગર ડેરી)માં સને-2005થી સને -2016 દરમ્યાન ચેરમેન તરીકે વિપુલભાઇ માનસિંગભાઇ ચૌધરી કાર્યરત હતા.તે દરમ્યાન વિપુલભાઇ માનસિંગભાઇ ચૌધરી,તત્કાલીન ચેરમેન,દુધસાગર ડેરી, મહેસાણાનાએ વર્ષ 2005 થી સને -2016 સુધીમાં પોતાની સત્તાનો દુરઉપયોગ કરી,ટેન્ડર પ્રક્રિયા કર્યા વગર બલ્ક મિલ્ક કુલરની ખરીદી કરી,ગેરકાયદેસ રીતે એડવોકેટનો ખર્ચ સંઘમાંથી ઉધારી,સંસ્થા દ્વારા સક્ષમ અધિકારીની પૂર્વ પરવાનગી વગર કરોડોના બાંધકામ કરી મોટા પાયે ભ્રષ્ટ્રાચાર આચરી સત્તાનો દૂરઉપયોગ કરેલ છે.તેમજ પ્રોવાઇડિંગ એન્ડ સપ્લાય એન્ડ ઇન્સ્ટોલેશન ઓફ હોડીંગ બોર્ડ બનાવવા માટે ઉંચા ભાવવાળી કંપનીને કોન્ટ્રાક્ટ આપી તેને ફાયદો કરાવેલ છે.તેમજ સાગરદાણ ભરવાના બોરા ખરીદીમાં બજાર કિંમતથી ઉંચા ભાવે વધુ ચુકવી બારદાનની ખરીદી કરી સંઘને આર્થિક નુકસાન કરેલ છે.તેમજ વિપુલભાઇ માનસિંગભાઇ ચૌધરી,તેમની પત્નિ ગીતાબેન ચૌધરી,તેમના દિકરા પવન ચૌધરી તથા તેઓના મળતીયા માણસો સાથે મળઈ,બનાવટી રજીસ્ટર્ડ કંપનીઓ ઉભી કરી.તેમાં ડાયરેક્ટર તરીકે પોતાના પરિવારના સભ્યો ગીતાબેન વિપુલભાઇ ચૌધરી,પવન વિપુલભાઇ ચૌધરી તથા અન્ય સગા સંબંધીઓને રાખી 2005થી આજ દિન સુધીમાં ધી મહેસાણા દુધ ઉત્પાદક સંઘ લીમીટેડમાંથી અપ્રમાણીક પણે એક બીજાના મેળાપીપણામાં ગેરરીતી આચરી અંદાજીત રૂપિયા 750 કરોડની ઉચાપત કરી હોવાનુ સામે આવ્યુ છે.સત્તાનો દુરુઉપયોગ કરી પોતાના અંગત નાણાકીય લાભ માટે મેળવેલ કરોડો રૂપિયાની રકમ બનાવટી રજીસ્ટર્ડ કંપનીઓ મારફતે હેરફેર કરી ભ્રષ્ટાચાર આચરી પોતાના હોદ્દાનો દુરઉપયોગનો ગુન્હો કર્યો છે.
અત્રે ઉલ્લેખનીય છે કે આરોપીઓ વિરૂદ્ધ મહેસાણા એ.સી.બી પોલીસ સ્ટેશનમાં ગુનો દાખલ કરવામાં આવ્યો છે.હાલ વિપુલ ચૌધરી અને સીએની ધરપકડ કરવામાં આવી છે.જેની પૂછપરછ ચાલી રહી છે.
