ગત 7 સપ્ટેમ્બરના રોજ સુરતના રાંદેરખાતે આવેલ સૂર્યપુર સોસાયટીમાં રહેતા અને ક્વોરી ઉદ્યોગ તેમજ સહકારી ક્ષેત્ર સાથે જોડાયેલા 74 વર્ષીય દુર્લભ પટેલે માંડવીના ખંજરોલી ખાતે તેમની સ્ટોન ક્વોરીની ખાણમાં ઝંપલાવીને આત્મહત્યા કરી લેવાની ઘટનામાં તપાસ અધિકારી બારડોલી ડીવાયએસપીએ શુક્રવારના રોજ ફરિયાદમાં રજૂ કરવામાં આવેલી વિગત મુજબ ઇન્કમટેક્ષ વિભાગ પાસે કેટલાક દસ્તાવેજોની માંગણી કરી છે.અને અન્ય કેટલીક બાબતોમાં પણ ગુપ્ત રાહે તપાસ શરૂ કરી હોવાનું જાણવા મળ્યું છે.
આ અંગે મળતી માહિતી અનુસાર બહુચર્ચિત દુર્લભ પટેલ આત્મહત્યા પ્રકરણમાં તેમના પુત્ર ધર્મેશ પટેલે માંડવી પોલીસ સ્ટેશનમા રાંદેર પી.આઈ લક્ષ્મણસિંહ બોડાણા તેમજ અન્ય 11 આરોપીઓ સામે આત્મહત્યાની દુષ્પ્રેરણાનો ગુનો નોંધાવ્યો હતો. જેમાં દુર્લભ પટેલે આત્મહત્યા કરતાં પહેલા સ્વહસ્તાક્ષરે લખેલી સ્યૂસાઇડ નોટમાં સુરતના સબ ડિસ્ટ્રિક્ટ અડાજણ ખાતે ગામ પીસાદમાં આવેલ એક જમીનનો સોદો સ્ટારગૃપના માલીક કિશોર ભૂરા કોશિયા સાથે કર્યા બાદ આ જમીન ખરીદનાર કિશોર કોશિયાને ત્યાં ઇન્કમટેક્ષની રેડ પડી હતી.જે ઇન્કમટેક્ષની તપાસમાં જમીન સોદાની ચિઠ્ઠી બાબતેની સત્ય હકીકત બહાર આવી હતી.ત્યારબાદ ઇન્કમટેક્ષના કેસમાં દુર્લભભાઈ તેમજ કિશોર કોશિયા ઉપર કેસ ચાલ્યો હતો.તે કેસ દરમ્યાન કિશોર કોશિયાએ ભાગીદાર બાબતે ખોટી માહિતી આપતા ઇન્કમટેક્ષ વિભાગે દુર્લભભાઈ પટેલને 8,49,49,020 ની રકમ તેમજ 4.80 કરોડની પેનલ્ટી સાથે 13 કરોડ રૂપિયા ભરવા માટે ઇન્કમટેક્ષ વિભાગે દુર્લભભાઈને નોટીસ આપી હતી. જે પ્રકરણમાં વિવાદ થયા બાદ જ અંતે દુર્લભભાઈએ આત્મહત્યા કરી લેવી પડી હતી. જે બાબતની માહિતી ઇન્કમટેક્ષ વિભાગ પાસે આઈ.ઓ ડીવાયએસપી રૂપલ સોલંકીએ માંગી છે. આ ઉપરાંત અન્ય કેટલીક ગુપ્ત તપાસ પણ શરૂ કરી છે.જોકે આ અંગે તપાસ ચાલુ હોવાથી અધિકારી બોલવા તૈયાર નથી.
ફરિયાદી ધર્મેશ પટેલના મોબાઈલમાંથી પોલીસે કેટલાક મહત્વના પુરાવા એકત્રિત કર્યા
દુર્લભ પટેલ આત્મહત્યા પ્રકરણમાં મુખ્ય સાક્ષી તેમનો પુત્ર ધર્મેશ પટેલ જ છે.તેમણે તેના મોબાઈલમાં આ સમગ્ર ઘટનાને લઈ કેટલાક મહત્વના પુરાવાઓ એકત્રિત કર્યા હતા. જેમાં પી.આઈ બોડાણાએ ફાર્મ હાઉસનું લોકેશન મોકલ્યું હતું તેમજ અનેક વિગતો તેમના મોબાઈલમાં હતી પોલીસે આ તમામ પુરાવાઓ એકત્રિત કર્યા હોવાનું જાણવા મળ્યું છે.
