દેવભૂમિદ્વારકા જિલ્લામાં ઝારેરા ગામે લોકડાયરાનું આયોજન કરવામાં આવ્યું હતું.લોકડાયરા દરમીયાન ચલણી નોટોના વરસાદ વચ્ચે બે રાઉન્ડ ફાયરીંગ કર્યાનો વીડિયો વાઇરલ થયો હતો.ફાયરિંગનો વીડિયો સોશિયલ મીડિયામાં વાઈરલ થતા પોલીસ સાથે જ SOGએ ફાયરિંગ કરનાર શખ્સની અટકાયત કરી છે.પોલીસે શખ્સ સામે ગુનો નોંધીને વધુ તપાસ હાથ ધરી છે.
બનાવની પ્રાપ્ત વિગતો અનુસાર, 23 જાન્યુઆરી 2023ના રોજ ભાણવડ તાલુકાના ઝારેરા ગામે ખાતે સંત શ્રી દાસારામ બાપાની જન્મ જયંતીના પ્રસંગે રાત્રે લોકડાયરાનું આયોજન કરવામાં આવ્યું હતું.લોકડાયરામાં એક વ્યક્તિએ પોતાની પાસે રહેલા હથયિરથી હવામાં ફાયરિંગ કર્યું હતું.લોકડાયરામાં થયેલા આ ફાયરિંગનો વીડિયો સોશિયલ મીડિયામાં વાઈરલ થઇ ગયો હતો.વીડિયો વાઈરલ થતાં પોલીસ હરકતમાં આવી હતી.
પોલીસે વાઈરલ વીડિયો અંગે ઝીણવટભરી તપાસ હાથ ધરી હતી.સમગ્ર કાર્યમક્રમ યુ-ટ્યુબમાં “shree Dasaram Mandir Zarera” નામની ચેનલ ઉપર ઉપલબ્ધ હોય જે સમગ્ર કાર્યક્રમનો વીડિયો ચકાસવામાં આવ્યો હતો.જેમાં એક ઇસમ દ્વારા ચાલુ કાર્યક્રમ દરમિયાન સ્ટેજની સામે મોટી સંખ્યામાં લોકોનો હાજરી હોવા છતાં રોફ જમાવવા માટે ગેરકાયદેસર રીતે હવામાં બે રાઉન્ડ ફાયરિંગ કર્યું હોવાનું સામે આવ્યું હતું.ફાયરિંગ કરનાર શખ્સની પોલીસ અને એસઓજીની ટીમ દ્વારા શોધખોળ હાથ ધરવામાં આવી હતી અને અટકાયત કરીને આગળની કાર્યવાહી હાથ ધરાઈ છે.
