સુરેન્દ્રનગર , 21 માર્ચ 2023 મંગળવાર : રાજકોટ ACB દ્વારા સુરેન્દ્રનગર જિલ્લાના ધાંગધ્રા ખાતે રેન્જ ફોરેસ્ટ ઓફિસર તરીકે ફરજ બજાવનારા ચેતનપુરી ગોસ્વામી નામના ક્લાસ ટુ ઓફિસરને રૂ. 17,000ની લાંચ લેતા રંગેહાથ ઝડપી પાડવામાં આવ્યા છે.અગાઉ ફરિયાદી પાસેથી બે કટકે 58000 રૂ. લીધા હોવાનો ફરીયાદમાં ઉલ્લેખ કરવામાં આવ્યો છે.
આ અંગે ACBના પીઆઇ આર.આર.સોલંકીના જણાવ્યા મુજબ, ફરિયાદીનું હિટાચી મશીન તથા લોન્ચર ચેતનપુરી ગોસ્વામી દ્વારા મીઠાના અગરમાંથી ઝડપી પાડવામાં આવ્યું હતું.ફરિયાદીને કુળા ગામ પાસે આવેલ ફોરેસ્ટની બીટ ઓફિસે લઈ જવામાં આવ્યા હતા.જ્યાં ફરિયાદીને હિટાચી મશીન તથા લોન્ચર ડિટેઇન કરી કોર્ટમાં મોકલી મોટો દંડ કરવાનું તેમજ 6 મહિના સુધી હિટાચી મશીન અને લોન્ચર નહીં છોડવાનું જણાવવામાં આવ્યું હતું.ફરિયાદી દ્વારા ચેતનપુરી ગોસ્વામી સમક્ષ હાજર દંડ આપવા વિનંતી કરવામાં આવી હતી.
જો કે ચેતનપુરી ગોસ્વામી દ્વારા જણાવવામાં આવ્યું હતું કે, દંડ ન ભરવો હોય તો એક લાખ રૂપિયા આપવા પડશે.સમગ્ર મામલે ફરિયાદી અને આરોપી વચ્ચે રકજક થતા અંતે 75 હજાર રૂપિયામાં ડીલ ફાઈનલ થઇ હતી.જે અંતર્ગત 50,000 રૂપિયા 18 માર્ચના રોજ ફરિયાદીએ આપી દીધા હતા.જે બાદ 19 માર્ચના રોજ 8000 રૂપિયા આપવામાં આવ્યા હતા.તેમજ આજરોજ બાકીના 17000 રૂપિયાની આરોપી દ્વારા માગણી કરવામાં આવી રહી હતી.જે અનુસંધાને ફરિયાદીએ ACBનો સંપર્ક સાધતા ACB દ્વારા છટકું ગોઠવી આરોપીને 17,000ની લાંચની માગણી કરી સ્વીકારવાના કેસમાં ઝડપી પાડવામાં આવ્યા છે.
