ગાંધીનગર : દિલ્હીમાં વડાપ્રધાન નરેન્દ્ર મોદીના અધ્યક્ષસ્થાને મળેલી આર્થિક બાબતોની કેબિનેટ કમિટીની બેઠકમાં વડાપ્રધાનના ડ્રીમ પ્રોજેક્ટ ધોલેરામાં ન્યૂ ગ્રીન ફિલ્ડ એરપોર્ટનું નિર્માણના પ્રથમ તબક્કા માટે રૂ.૧૩૦૫ કરોડના ખર્ચની મંજૂરી અપાઇ હતી.આ પ્રોજેક્ટ ૪૮ મહિનામાં પૂર્ણ કરાશે એમ નક્કી કરાયું છે.ભારત સરકારના આ નિર્ણયનો મુખ્યમંત્રી ભૂપેન્દ્ર પટેલે આભાર માન્યો છે.મુખ્યમંત્રીએ કહ્યું છે કે,વડાપ્રધાને દેશના ગ્રોથ એન્જિન ગુજરાતમાં ગ્રીનફિલ્ડ એરપોર્ટ પ્રોજેક્ટના પ્રથમ તબક્કાને મંજૂરી આપતાં મલ્ટી-મોડેલ કનેક્ટિવિટી અને પી.એમ.ગતિશક્તિના ભવિષ્યલક્ષી આયોજન સફળતાપૂર્વક રીતે સાકાર થઇ શકશે.આ પ્રોજેક્ટ એરપોર્ટ ઓથોરિટી ઓફ ઇન્ડિયા,નેશનલ ઇન્ડસ્ટ્રિયલ કોરિડોર ડેવલપમેન્ટ એન્ડ ઇમ્પ્લિમેન્ટેશન ટ્રસ્ટ તથા ગુજરાત સરકારના સંયુકત સાહસ ધોલેરા ઇન્ટરનેશનલ એરપોર્ટ કંપની લિમિટેડ મારફતે સાકાર થશે.
ધોલેરાનું આ સૂચિત ઇન્ટરનેશનલ એરપોર્ટ ધોલેરા સ્પેશ્યલ ઇન્વેસ્ટમેન્ટ રિજિયનના કાર્ગો ટ્રાફિક હેન્ડલિંગ દ્વારા આસપાસના ઔદ્યોગિક વિસ્તારોનું કાર્ગો પરિવહન કરશે તથા અમદાવાદ એરપોર્ટના અન્ય વિકલ્પ તરીકે પણ ઉપયોગી થશે.અમદાવાદથી અંદાજે ૮૦ કિ.મી.ના અંતરે આવેલું સૂચિત ધોલેરા એરપોર્ટ આગામી ર૦રપ-ર૬ સુધીમાં કાર્યરત થવાનું આયોજન છે.આ એરપોર્ટ શરૂઆતના તબક્કે વાર્ષિક ૩ લાખ પેસેન્જરનું વહન કરશે.જે ભવિષ્યના બે દાયકામાં-ર૦ વર્ષમાં વાર્ષિક ર૩ લાખ પેસેન્જર સુધી પહોચવાનો અંદાજ છે.ર૦રપ-ર૬ માં વાર્ષિક ર૦ હજાર ટન કાર્ગો ટ્રાફિક વહન ક્ષમતા પણ ર૦ વર્ષમાં વાર્ષિક ર લાખ ૭૩ હજાર ટન પહોચે તેવી ધારણા છે.
