સાપુતારા : દંડકારણ્યની પાવન ભૂમિ ઉપર આવેલા આહવા ખાતે તાજેતરમા નવનાથ ધામ-બીલીમોરાના વર્તમાન ગાદીપતિ, વિશ્વવંદનીય પ.પૂ. શ્રી છોટેદાદા દ્વારા શ્રી ગોરક્ષ મત્સ્યેન્દ્ર મહાદેવ મંદિરના નિર્માણ માટે ભવ્ય શિલાન્યાસ સમારોહ યોજવામા આવ્યો હતો.
ઉલ્લેખનીય છે કે, બ્રહ્મલીન પરમ પૂજ્ય શ્રી સાનેદાદા દ્વારા આજથી 50 વર્ષ પૂર્વે, આહવા મુકામે શ્રી ગોરક્ષ મત્સ્યેન્દ્ર મહાદેવ મંદિરના શિવલિંગની સ્થાપના કરવામા આવી હતી.જે મંદિરના નિર્માણ માટે નવનાથ ધામ બીલીમોરાના વર્તમાન ગાદીપતિ, પરમ પૂજ્ય શ્રી છોટેદાદા ના માર્ગદર્શન અને નેતૃત્વ હેઠળ આ શિલાન્યાસ સમારોહ યોજવામા આવ્યો હતો. કાર્યક્રમમા મહંતશ્રી ભીડભંજન મહાદેવ મંદિર, જેતપુર રાજકોટના શ્રી કમલ નાથજી બાપુ સહિત શ્રી નરેશભાઇ પટેલ મંત્રી, ગુજરાત સરકાર, અને ડાંગના ધારાસભ્ય વિજયભાઈ પટેલ, વસુધારા ડેરીના ચેરમેન ગમનભાઈ, તથા ડાંગના ગામેગામથી મોટી સંખ્યામા ભાવિક ભક્તો ઉપસ્થિત રહ્યા હતા.આ પ્રસંગે વિશ્વવંદનીય પરમ પૂજ્ય છોટેદાદા એ ડાંગની દંડકારણ્ય ની આ પાવનભૂમિ, કે જ્યાં ભગવાન શ્રીરામ ના પાવન પગલા પડ્યા હતા, તેને કોટી કોટી વંદન કર્યા હતા.તેમણે શબરીના એઠા બોરનો પ્રસંગ યાદ કરી, નાતજાતના ભેદભાવ વગર સૌને સમાન રહેવાનો સંદેશો પાઠવ્યો હતો.આ બંને શિવલિંગનો ઇતિહાસ જણાવતા તેમણે પોતાના ગુરુદેવ બ્રહ્મલીન પરમ પૂજ્ય શ્રી સાનેદાદા ને યાદ કર્યા હતા, અને ડાંગના આદિવાસી ભક્તોનો ગુરુદેવે સ્થાપેલ બંને શિવલિંગના સંવર્ધન કરવા માટે આભાર પણ વ્યક્ત કર્યો હતો.પૂજ્ય છોટેદાદા એ જણાવ્યું હતું કે, આદિવાસી એટલે કે જેઓ પ્રકૃતિના ઉત્પત્તિ કાળથી હતા, છે અને રહેશે..આદિવાસીઓએ જ આદિ સંસ્કૃતિનું રક્ષણ કર્યું છે, અને માનવજાતને ગામડાથી શહેરો સુધી પહોંચાડી છે.તેમણે આહવાન કર્યું હતું કે નિર્માણ થનાર મંદિર, ઘંટ અને દાનપેટી વાળું મંદિર નહીં, પરંતુ માનવ ઉત્થાનના અને બહુજન હિતાય, બહુજન સુખાય ના કાર્યો કરનાર, એક પાવરફુલ ન્યુકિલઅસ બનશે. આ મંદિર થકી ડાંગમા વિવિધ સેવાકીય પ્રવૃતિઓ અવિરત ચાલતી રહેશે.કાર્યક્રમમાં ઉપસ્થિત રહેલા મંત્રી નરેશભાઇ પટેલ અને ધારાસભ્ય વિજયભાઈ પટેલે પરમ પૂજ્ય શ્રી છોટેદાદાના ધાર્મિક અને સેવા કાર્યોને બિરદાવી, ભવિષ્યમા થનાર સેવા કાર્યો કરવા માટે પોતાનો સંપૂર્ણ સહકાર રહેશે એમ જણાવ્યુ હતુ.આ પ્રસંગે એક ઉત્તમ પરમાર્થ કાર્ય પણ થયુ હતું.આજુબાજુના વિસ્તારના જરૂરિયાત મંદોને ‘ગોરખ ખીચડી ; અનાજ કીટ’નુ પરમ પૂજ્ય શ્રી છોટેદાદા દ્વારા વિતરણ કરવામા આવ્યુ હતુ.શિલાન્યાસ સમારોહમા મહાપ્રસાદ, ભોજનની પણ વ્યવસ્થા કરવામા આવી હતી.જેનો અંદાજિત ૩૦૦૦ થી વધુ ઉપસ્થિત ભક્તોએ મહાપ્રસાદ લાભ લીધો હતો.
