– રશિયા-યુક્રેન યુદ્ધ મુદ્દે ડોનાલ્ડ ટ્રમ્પનો ફરી વાણીવિલાસ
– મારા કાર્યકાળ દરમિયાન રશિયા અમેરિકાનું સન્માન કરતું હતું,પરંતુ હવે તે બાઇડનને નબળાં સમજે છે : પૂર્વ પ્રમુખ
વોશિંગ્ટન : રશિયા અને યુક્રેન વચ્ચે ચાલી રહેલાં ઘર્ષણ મુદ્દે અમેરિકાના પૂર્વ રાષ્ટ્રપતિ વારંવાર વાણીવિલાસ કરી રહ્યા છે.હવે તેમણે એવું નિવેદન આપ્યું છે કે રશિયાના સ્માર્ટ રાષ્ટ્રપતિ વ્લાદિમીર પુતિન સામે અમેરિકાના રાષ્ટ્રપતિ અને નાટોએ મૂર્ખતાપૂર્ણ કામ કર્યું છે.
આ ઉપરાંત ટ્રમ્પનો દાવો છે કે જો તેઓ રાષ્ટ્રપતિ હોત તો રશિયા ક્યારેય યુક્રેન પર હુમલો ન કર્યો હોત અને આવી પરિસ્થિતિ પણ ન સર્જાઇ હોત.ઓરલાન્ડો શહેરમાં યોજાયેલા એક રાજકીય કાર્યક્રમમાં ટ્રમ્પે ઘણાં વિવાદાસ્પદ નિવેદનો આપી સરકાર પર શાબ્દિક પ્રહારો કર્યા હતા.
ફ્લોરિડા રાજ્યના ઓરલેન્ડોમાં યોજાયેલી વાર્ષિક કન્ઝર્વેટિવ પોલિટિકલ એક્સન કોન્ફરન્સમાં 86 મિનિટ સુધી ડોનાલ્ડ ટ્રમ્પે ભાષણ આપ્યું હતું.રશિયા દ્વારા યુક્રેન પર થયેલા હુમલા માટે મૂળભૂત રીતે અમેરિકાના વર્તમાન રાષ્ટ્રપતિ જો બાઇડન જવાબદાર હોવાનું નિવેદન પણ તેમણે આ સંબોધન દરમિયાન આપ્યું હતું.
તેમણે કહ્યું હતું કે રશિયા પર વ્યાપારિક અને આર્થિક પ્રતિબંધો લાદવાની વિચારણાની જગ્યાએ જો રશિયાને માનસિક રીતે ભાંગવાની કામગીરી કરવામાં આવી હોત તો આ પરિસ્થિતિ ન સર્જાઇ હોત.
સમસ્યા એ નથી છે કે પુતિન ખૂબ જ સ્માર્ટ છે પરંતુ આપણા નેતા અને નાટો મૂર્ખ છે તે જ બાબત જ સમસ્યા છે. ટ્રમ્પે કહ્યું હતું કે તેમના કાર્યકાળ દરમિયાન રશિયા અમેરિકાનું સન્માન કરતું હતું,પરંતુ હવે રશિયા વર્તમાન રાષ્ટ્રપતિ જો બાઇડનને નબળાં સમજે છે.
