– ગત ચૂંટણીની સરખામણીએ વલસાડ બેઠકનાં ભરતભાઈ પટેલનો વોટ શેર 12.43 ટકા વધ્યો જયારે કનુભાઈ દેસાઈનો 10.24 ટકા વધ્યો: આ વખતે ધરમપુર અને કપરાડામાં ભાજપના બંને ઉમેદવારનો વોટ શેર ઘટ્યો
વલસાડ : ગુજરાત વિધાનસભાની ચૂંટણીના પરિણામમાં વલસાડ જિલ્લાની પાંચ બેઠક પૈકી સૌથી વધુ 74.47 ટકા વોટ શેર પારડી બેઠકના ભાજપના ઉમેદવાર કનુભાઈ દેસાઈનો નોંધાયો છે.ગત 2017ની ચૂંટણીમાં પણ જિલ્લામાં સૌથી વધુ 64.23 ટકા વોટ શેર કનુભાઈના જ હતા.ત્યારે આ ચૂંટણીમાં તેમના વોટ શેરમાં 10.24 ટકાનો સીધો વધારો નોંધાયો છે.
વલસાડ બેઠક પર ભાજપના ભરતભાઈ પટેલનો વર્ષ 2017ની ચૂંટણીમાં વોટ શેર 60.49 ટકા હતો જે વર્ષ 2022ના પરિણામમાં 12.43 ટકા વધીને 72.92 ટકા થયો છે.ધરમપુરમાં ભાજપના અરવિંદ પટેલનો વર્ષ 2017માં વોટ શેર 53.53 ટકા હતો.જે વર્ષ 2022માં 11.29 ઘટીને 42.24 ટકા થયો છે.ઉમરગામના ભાજપના રમણલાલ પાટકરનો વર્ષ 2017માં વોટ શેર 60.87 ટકા હતો જે વર્ષ 2022માં 3.71 ટકા વધીને 64.58 ટકા થયો છે.જ્યારે કપરાડાના જીતુભાઈ ચૌધરી વર્ષ 2017ની ચૂંટણીમાં કોંગ્રેસમાં હતા ત્યારે 170 મતની સરસાઈથી વિજય થયા હતા ત્યારે તેમનો વોટ શેર 47.59 ટકા હતો ત્યાર બાદમાં ભાજપમાં પ્રવેશ થતા વર્ષ 2020માં પેટા ચૂંટણી થતા જીતુભાઈ પોતાના પ્રતિસ્પર્ધીથી 47066 મતે વિજય થતા તેમનો વોટ શેર 60.43 ટકા થયો હતો.વર્ષ 2022ની ચૂંટણીમાં તેમનો વોટ શેર 16.97 ટકા ઘટીને 43.46 ટકા નોંધાયો છે.
આમ જિલ્લાની પાંચ બેઠક પૈકી વલસાડ,પારડી અને ઉમરગામમાં ભાજપના ઉમેદવારોનો વોટ શેર વધ્યો છે.જ્યારે ધરમપુર અને કપરાડા બેઠક પર આદિવાસી મતદારોનું પ્રભુત્વ હોવાની સાથે સાથે વર્ષ 2022ની ચૂંટણીમાં ધરમપુરમાં આમ આદમી પાર્ટી,કોંગ્રેસ અને અપક્ષ ઉમેદવારના કારણે મતોના ભાગલા પડતા અસર વર્તાઈ હતી.જ્યારે કપરાડામાં ભાજપના ઉમેદવારનો વોટ શેર કોંગ્રેસ અને આમ આદમી પાર્ટીના કારણે ઘટ્યો હતો.
