બારડોલી : 90થી 120 દિવસમાં રૂપિયા અઢી ગણા કરવાની લાલચ આપી RE ગોલ્ડ નામના સંચાલકોએ બારડોલીના બે ગ્રાહકો પાસે 12.46 લાખનું રોકાણ કરાવી ત્યારબાદ મુદ્દલ કે વળતર ન આપી છેતરપિંડી કરતાં સંચાલકો સહિત આઠ સામે બારડોલી ટાઉન પોલીસ મથકમાં ગુનો નોંધાતા ચકચાર મચી ગઈ છે.અગાઉ પણ એકના ડબલ કરવાની લાલચમાં બારડોલીમાં અનેક લોકોના લાખો રૂપિયા ડૂબી ગયા હતા.
આ અંગે મળતી માહિતી અનુસાર બારડોલીના શાસ્ત્રી રોડ પર આવેલી વૃંદાવન સોસાયટીમાં રહેતા પરેશભાઈ મગનભાઇ ચૌહાણે જુલાઈ 2021માં મિત્ર કિશોરભાઇ સોની (રહે, બારડોલી) સાથે શાસ્ત્રી રોડ પર આવેલ માર્વેલ શોપર્સ એપાર્ટમેંટના પહેલા માળે RE ગોલ્ડની બ્રાન્ચ ઓફિસમાં ગયા હતા.જ્યાં તેમને ઓફિસ ના સંચાલક જલ્પાબેન પટેલ (રહે વિઠ્ઠલનગર સોસાયટી, અસ્તાનજીન, અસ્તાન, તા.(બારડોલી) અને સન્નારીવાળા વિપુલભાઈ શાહ (રહે સનસિટી, તેન, તા. બારડોલી)એ RE ગોલ્ડમાં રોકાણ વિષેની વિગતવાર માહિતી આપી હતી.જેમાં એક આઈ.ડી. ખોલવાના રૂ. 2400 અને એક સાથે અગિયાર આઈ.ડી. ખોલવા માટે રૂ. 26 હજાર 400 ભરો તો 90 થી 120 દિવસમાં 80 હજાર રૂપિયા મળશે.અને 38 હજાર 500 રૂપિયાની આઈ.ડી. ખોલો તો 1 લાખ રૂપિયા મળશે આવી સમજણ આપતા લાલચમાં આવી જઇ પરેશ ચૌહાણે આઈ.ડી.,જનરેટ કરાવી 26 હજાર 400ની પાંચ અને 38 હજાર 500ની એક આઈ.ડી. મળી કુલ 6 આઈ.ડી. હેઠળ 1 લાખ 70 હજાર 500 રૂપિયા ગૂગલ પે અને રોકડેથી જલ્પાને આપ્યા હતા.ત્યારબાદ પરેશભાઈ અને કિશોરભાઈ સુરતના ડિંડોલી ખાતે આવેલી RE ગોલ્ડની ઓફિસે ગયા હતા જ્યાં કંપનીના એમ.ડી. આકાશ અજયભાઈ કઠેરિયા, સીએમડી અજયભાઈ ચિરજીલાલ કઠેરિયા, સીએમડી સર્વેશભાઈ અજયભાઈ કઠેરિયાને મળ્યા હતા અને તેમણે પણ પ્લાન વિષે સમજાવ્યું હતું.તેમજ જો બીજા ગ્રાહકો લાવશો તો કમિશન તેમજ અન્ય લોભામણી લાલચો આપી હતી.આથી લાલચમાં આવી જઇ પરેશભાઈએ 20 આઈ.ડી.ના રૂપિયા 5 લાખ 40 હજાર 100 રૂપિયાનું રોકાણ કર્યું હતું. જ્યારે કિશોરભાઈ સોનીએ બારડોલીના RE ગોલ્ડ કંપનીમાં કુલ 24 આઈ.ડી. મારફતે રૂપિયા 7 લાખ 06 હજાર 200 મળી કુલ 12 લાખ 46 હજાર 300નું રોકાણ કર્યું હતું.
દરમ્યાન રોકાણ કર્યાના ત્રણ મહિના બાદ જ્યારે તેમનું વળતર લેવા માટે ગયા તો પરત કર્યું ન હતું અને આજદિન સુધી મુદ્દલ કે તેનું વળતર નહીં ચૂકવતા આખરે પોલીસનો સહારો લેવો પડ્યો હતો.પરેશભાઈ ચૌહાણે બારડોલી પોલીસ મથકમાં વિપુલ શાહ સન્નારીવાળા (રહે સનસિટી, તેન, બારડોલી), એમ.ડી. આકાશ અજયભાઈ કઠેરિયા (રહે 204 રીઝન પ્લાઝા, ડિંડોલી, સુરત, મૂળ રહે ઉત્તરપ્રદેશ), સી.એમ.ડી. અજય ચિરજીલાલ કઠેરિયા (રહે 204 રીઝન પ્લાઝા, ડિંડોલી, સુરત, મૂળ રહે ઉત્તરપ્રદેશ),સર્વેશબેન અજયભાઈ કઠેરિયા (રહે 204 રીઝન પ્લાઝા, ડિંડોલી, સુરત, મૂળ રહે ઉત્તરપ્રદેશ), જલ્પાબેન પટેલ (રહે અસ્તાન જીન, વિઠ્ઠલ નગર સોસાયટી, અસ્તાન, તા. બારડોલી) અને શૈલેષ પરમાર (રહે શીતલનગર સોસાયટી, બારડોલી)ની સામે ફરિયાદ આપતા બારડોલી પોલીસે છેતરપિંડી વિશ્વાસઘાતનો ગુનો નોંધી આગળની તપાસ હાથ ધરી છે.
