ચંદીગઢ : તા.16 જૂન 2022, ગુરૂવાર : નેશનલ લેવલના શૂટર સુખમનપ્રીત સિંહની હત્યા મામલે CBIને મોટી સફળતા મળી છે.CBI તરફથી કહેવામાં આવ્યું છે કે,કલ્યાણી સિંહ નામના એક આરોપીની ધરપકડ કરવામાં આવી છે.આરોપી ક્લયાણી સિંહની મા હિમાચલ પ્રદેશ હાઈકોર્ટના મહિલા જજ છે.બીજી તરફ મૃતક છોકરાના પિતા પંજાબ એન્ડ હરિયાણા હાઈકોર્ટમાં આસિસટન્ટ સોલિસિટર જનરલ હતા. છોકરાના દાદા પંજાબ હરિયાણા હાઈકોર્ટમાં જજ હતા.ઘટનાને લઈને કહેવામાં આવી રહ્યું છે કે,લવ એન્ગલના કારણે છોકરાની હત્યા કરવામાં આવી હતી.નેશનલ લેવલના શૂટર અને વકીલ સુખમનપ્રીત સિંહ સિદ્ધુ ઉર્ફે સિપ્પી સિદ્ધુની ચંદીગઢના સેક્ટર 27ના એક પાર્કમાં ગોળી મારીને હત્યા કરી દેવામાં આવી હતી.આ ઘટનાના લગભગ 7 વર્ષ બાદ CBI અધિકારીઓએ બુધવારે હિમાચલ પ્રદેશ હાઈકોર્ટના ન્યાયાધીશ જસ્ટિસ સબીનાની પુત્રી કલ્યાણી સિંહની ધરપકડ કરવામાં આવી છે.જસ્ટિસ સબીના હિમાચલ પ્રદેશ હાઈકોર્ટના કાર્યકારી મુખ્ય ન્યાયાધીશ પણ છે.
સિપ્પીની 20 સપ્ટેમ્બર 2015ના રોજ ગોળી મારીને હત્યા કરી દેવામાં આવી હતી.હત્યામાં 12 બોરની પિસ્ટોલનો ઉપયોગ કરવામાં આવ્યો હતો અને તેમાંથી 4 ગોળી ચલાવવામાં આવી હતી.ચંદીગઢ પોલીસે સેક્ટર 26 પોલીસ સ્ટેશનમાં હત્યાનો કેસ નોંધ્યો હતો.જાન્યુઆરી 2016માં આ કેસ CBIને ટ્રાન્સફર કરી દેવામાં આવ્યો હતો.ત્યારબાદ તપાસ એજન્સીએ હત્યાનો કેસ નોંધી તપાસ શરૂ કરી હતી.સપ્ટેમ્બર 2016માં CBIના અધિકારીઓએ હત્યાના આ મામલે પુરાવા આપનારને 5 લાખ રૂપિયાનું ઈનામ આપવાની ઘોષણા કરી હતી.
CBIએ સમાચારપત્રમાં જાહેરાત પણ આપી હતી તેમાં કહેવામાં આવ્યું હતું કે,આ માનવાનું કારણ એ છે કે,હત્યા સમયે સિપ્પીના હત્યારા સાથે એક મહિલા પણ હતી.આ મહિલા સામે આવીને પોતે નિર્દોષ હોવાનો પુરાવો અમને આપી શકે છે અથવા એવું માની લેવામાં આવશે કે,તે આ અપરાધમાં સામેલ હતી.ડિસેમ્બર 2021માં CBIએ ઈનામ રકમ વધારીને 10 લાખ રૂપિયા કરી લીધા હતા.જોકે,તપાસ એજન્સી આ મામલે આગળ વધવામાં વિફળ રહી હતી.
કલ્યાણી સિંહની ધરપકડ કરી લેવામાં આવી છે.CBI સૂત્રોના જણાવ્યા પ્રમાણે આ પ્રેમ પ્રસંગ સાથે સબંધિત મામલો છે.બુધવારે કલ્યાણીને CBIના સ્પેશિયલ જ્યુડિશિયલ મેજિસ્ટ્રેટ સુખદેવ સિંહ સમક્ષ રજૂ કરવામાં આવી હતી જેમણે તેને ચાર દિવસની સીબીઆઈ કસ્ટડીમાં મોકલી આપી હતી.આ કેસની છેલ્લી સુનાવણી દરમિયાન CBIએ સિપ્પી હત્યાકાંડમાં આગળની તપાસ સબંધે સ્થિતિ રિપોર્ટ દાખલ કરવા માટે એક મહિનાનો સમય માંગ્યો હતો.સિપ્પી એક નેશનલ લેવલના શૂટર અને વકીલ હતા તેમની ચંડીગઢમાં લો ફર્મ પણ હતી.
