ન્યૂઝપેપરના નામે ફેક ન્યૂઝ વાયરલ કરનાર સોફ્ટવેર ડેવલોપરની ધરપકડ

-પાન-બીડીની એજન્સી નહીં ખૂલે તેવા ખોટા મેસેજથી શેઠને હેરાન કરવા કર્યા

– શેઠને હેરાન કરવા માટે એક અખબારના લોગોનો ઉપયોગ કરી પાન- બીડીની એજન્સી 3૧ મે, સુધી નહીં ખૂલે તેવા ખોટા સમાચાર વાયરલ કર્યા હતા. આ મામલે અખબારના માલિક,સંપાદકે ફરિયાદ નોંધાવતા પોલીસે સોફ્ટવેર ડેવલોપરની ધરપકડ કરી હતી.

રાજકોટ : ૧૯ મેના બપોરે રાજકોટથી પ્રસિધ્ધ થતાં રાજકોટ મિરર નામના અખબારના લોગો સાથે એક ફેક ઇમેજ વાયરલ થઇ હતી.જેમાં રાજકોટ શહેર પાન-બીડી વેપારી અને ગલ્લાઓના એસોસિએશનનો જનહિતમાં મોટો નિર્ણય.3૧ મે સુધી શહેરમાં કોઇ પણ એજન્સી કે દુકાન નહીં ખુલે એવા સમાચાર લખ્યા હતા.આ ફેક ન્યૂઝ વાયરલ કરનાર સામે અખબારના સંપાદક,માલિક પ્રતિપાલસિંહ જાડેજાએ આઇ.પી.સી.ની કલમ ૪૬૯,૪૭૧ અને આઇ.ટી. એક્ટની કલમ ૬૬ (સી) મુજબ સાયબર સેલમાં ફરિયાદ નોંધાવી હતી.ક્રાઇમ બ્રાંચના પીએસઆઇ એચ.બી.ધાંધલ્યાએ સાયબર સેલની મદદથી ફેક ઇમેજ વાયરલ કરનાર જીજ્ઞેશ મનસુખભાઇ સાવલીયા(રહે, જલારામ-૨, ઇન્દીરા સર્કલ નજીક)ની ધરપકડ કરી હતી.જીજ્ઞેશ સાવલીયા પોતે સોફ્ટવેર ડેવલોપર અને તેણે પોતાના માલિક ઠક્કરબાપાને બીડી-તંબાકુનું વ્યસન હોવાથી તેને હેરાન કરવા આવી ઇમેજ બનાવીને તેને ફોરવર્ડ કર્યાની કબૂલાત આપી હતી. જોકે શેઠખરાઇ કરવા બીજાને આ પોસ્ટ ફોરવર્ડ કરશે અને મામલો પોલીસ સુધી પહોંચશે તેવી ધારણા ન હતી.