રાજકોટ : ગુજરાત વિધાનસભા ચૂંટણીમાં 156 બેઠકો સાથે ભાજપનો ભવ્ય વિજય થયો છે.આ ઐતિહાસિક જીતમાં વડાપ્રધાન નરેન્દ્ર મોદીનો મહત્વપૂર્ણ ફાળો છે.ત્યારે ઉત્તરાયણનાં તહેવારમાં આકાશમાં ઉડનાર પતંગોમાં પણ મોદીનો ક્રેઝ જોવા મળી રહ્યો છે.પતંગ રસિયાઓમાં મોદીનાં વિવિધ ફોટાવાળી પતંગો આકર્ષણનું કેન્દ્ર બની રહી છે.વિધાનસભા ચૂંટણીમાં ભાજપનો ભવ્ય વિજય થતા જ પ્રધાનમંત્રી મોદી હવે પતંગોમાં પણ છવાઈ ગયા છે.
PM મોદીની તસવીરો ધરાવતા પતંગોની જોરદાર ડિમાન્ડ
જાણવા મળતી વિગત મુજબ વિધાનસભામાં 156 બેઠકો સાથે ભાજપની ઐતિહાસીક જીતની ઉજવણી પણ સંપન્ન થઇ ગઇ છે.પણ હવે આકાશમાં પણ આ ભવ્યજીતની ઉજવણી થવાં જઇ રહી છે.સુરતમાં વડાપ્રધાન મોદીનાં ફોટાવાળા પતંગોનું દિવસ અને રાત ઉત્પાદન થઇ રહ્યું છે.જયાંથી રાજકોટની સદર બજાર સ્થિત હોલસેલ રિટેલ માર્કેટમાં આ પતંગો આવી પહોંચ્યા છે.જેની જબ્બર ડિમાન્ડ હોવાનું હાલ હોલસેલ વિક્રેતાઓ જણાવી રહ્યા છે.
પતંગના ભાવમાં 20-25%નો વધારો
સદર બજાર ખાતેથી હોલસેલ વેપારી જયેશભાઇ વૈદ્ય કહે છે કે, મકરસંક્રાંતિને એક મહિના પહેલા બજારમાં ચહલ-પહલ શરૂ થઈ જતી હોય છે.કાગળ-કપાસમાં ભાવ વધારો થતા દોરા અને પતંગનાં ભાવમાં 20-25% વધારો નોંધાયો છે.આ વખતે ભાજપનો ભવ્ય વિજય થયો હોવાથી વડાપ્રધાન મોદી અને ડબલ એન્જીનની સરકાર સહિતની પતંગો આકર્ષણનું કેન્દ્ર બની ગઈ છે.લોકોમાં મોદીની પતંગોની ભારે માંગ જોવા મળી રહી છે.જોકે બાળકોમાં કાર્ટૂન કેરેક્ટરની પતંગોની માંગ યથાવત છે. પરંતુ મોટેરાઓ મોદી અને ભાજપ ઉપર પસંદગી ઉતારી રહ્યા હોવાથી ઉત્તરાયણ મોદીમય બની રહેશે.
આકાશમાં ઉડશે PM મોદીના પતંગો
આ ઉપરાંત મોદીની 56ની છાતી હોવાનું કહેવાય છે.એ કારણે માંજા રીલમાં એકે-56 બ્રાન્ડ સૌથી વધારે લોકપ્રિય બની છે.ત્યારે એકે-56ની સંગતમાં મોદીનાં ફોટાવાળા પતંગોનાં પેચ લગાવવા હાલ પતંગબાજો થનગની રહ્યા છે.ત્યારે મકરસંક્રાંતિ મોદીમય બની જશે તે કહેવું જરાપણ અતિશયોક્તિ ભર્યું નથી.
