વલસાડની અતુલ કંપનીમાં કોન્ટ્રાક્ટરોના બેઝ ઉપર નોકરી મેળવવા માટે પોલીસ અને ગ્રામપંચાયતના રહેઠાણના દાખલા, સરપંચ,તલાટીના હોદ્દાવાળા કોરા કોમ્પ્યુટરાઇઝ ફાર્માવાળા તૈયાર દાખલા,પોલીસ એનઓસી તથા વેરિફિકેશનના તમામ બોગસ દસ્તાવેજો રજૂ કરનારા બે ઈસમને વલસાડ રૂરલ પોલીસે ઝડપી પાડી કાર્યવાહી હાથ ધરી છે.વલસાડ રૂરલ પોલીસના કાર્યક્ષેત્રમાં આવતી અતુલ કંપનીમાં વિવિધ કામગીરી માટે આપવામાં આવતા કોન્ટ્રાકટના કામો કોન્ટ્રાક્ટરો દ્વારા કરવામાં આવે છે.
કોન્ટ્રાકટરોના કામદારો માટે અતુલ કંપનીએ પોલીસ વેરિફિકેશન અને પોલીસની એનઓસી ફરજિયાત કરી છે.દરમિયાન મુજીબ રમજાન શેખ,રહે.મુકુન્દ,ગાર્ડન સો.અતુલ અને રિતેશકુમાર રમેશકુમાર શર્મા,રહે.આમલી,ગુ્ડ્ડુભાઇની ચાલમાં રહેતા બે જણાએ કંપનીના કોન્ટ્રાક્ટમાં નોકરી મેળવી પોલીસ વેરિફિકેશનની એનઓસી રજૂ કરી હતી.આ બંન્ને વ્યક્તિ લૂંટના કેસના આરોપી હોવાથી વલસાડ રૂરલ પોલીસ તપાસ કરી રહી હતી.રૂરલ પોલીસ દ્વારા એક લૂંટના કેસમાં 11 આરોપીની તલાશ કરી રહી હતી.
જેની તપાસમાં તે પેૈકીના આ આરોપીઓ અતુલ કંપનીના કોન્ટ્રાકટર હેઠળ કામ કરતા હોવાનું બહાર આવ્યું હતું.રૂરલ પીએસઆઇ જી.આઇ.રાઠોડે ટીમ લઇને અતુલ કંપનીમાં તપાસ કરતાં બંન્ને આરોપીઓની અટક કરી પૂછપરછ હાથ ધરી હતી.એનઓસી અને પોલીસ વેરિફિકેશનના દસ્તાવેજની તપાસ કરાતા બોગસ નિકળ્યા હતા.રૂરલ પોલીસે બંન્નેની ધરપકડ કરી આગળની તપાસ હાથ ધરી છે.આ બોગસ દસ્તાવેજો બનાવનાર કુલ 13 આરોપીમાં કિરીટ,આકાશ,વિજય,રામપ્રતાપ,અભિ,પરાજ,પવન,આદિલ,મયુર,શિતલ અને આનંદ જેમના નામઠામની હજી પોલીસને જાણ ન હોવાથી આ તમામ વોન્ટેડ જાહેર કરાયા છે.
ક્રોસ વેરિફિકેશન કરાયું
વલસાડ રૂરલ પોલીસે બંન્ને લૂંટના આરોપીઓએ રજૂ કરેલી પોલીસ એનઓસીના કાગળો તપાસતા તેની પોલીસ મથકમાં નોંધણી કે કોઇ એનઓસી આપી છે કે નહિ તેનું ક્રોસ વેરિફિકેશન કરવામાં આવતા આવી કોઇ નોંધણી પોલીસ મથકમાં થઇ જ નથી તેવું જાણવા મળ્યું હતું.
લૂંટના આરોપી કંપનીમાં કેવી રીતે લાગી ગયા તેની તપાસમાં કૌભાંડ બહાર આવ્યું
એસપી ડો.રાજદિપ સિંહ ઝાલાએ જણાવ્યું કે,લૂંટના આરોપી કંપનીમાં કામે કયા આધારે લાગી ગયા તે બાબતે તપાસ હાથ ધરાઇ હતી.અતુલ કંપનીમાં કામદારો માટે પોલીસ એનઓસી ફરજિયાત છે.લૂંટના આરોપીની તપાસમાં આ બે આરોપીઓ કંપનીમાં કામ કરતા હોવાની જાણ થતાં તેઓ કંપનીમાં કેવી રીતે નોકરીએ લાગ્યા તેની તપાસ કરી ચેક કરતા પોલીસ વેરિફિકેશન અને એનઓસી બોગસ હોવાનું બહાર આવ્યું હતું.
