બનાસકાંઠા જિલ્લામાં એસીબી વિભાગ ભ્રષ્ટાચારીઓને ડામવા માટે એક્શન મોડમાં આવ્યું છે.ત્યારે પાલનપુરના વર્ગ-2 ના સમાજ કલ્યાણ અધિકારી ₹10,000 ની લાંચ માંગતા ઝડપાઈ ગયા છે.આ અધિકારીએ છાત્રોના નિભાવ માટે મળતી સરકારી ગ્રાન્ટ પાસ કરવા અને તેમાં કોઈ ખામી ન કાઢવા માટે લાંચ માંગી હતી પરંતુ એસીબીના છટકામાં ફસાઈ ગયા હતા.
સરકારી ગ્રાન્ટ પાસ કરવા અને ખામી ન કાઢવા લાંચ માંગી હતી
પાલનપુરમાં વર્ગ-2માં સમાજ કલ્યાણ અધિકારી અમિત નરેન્દ્રભાઈ પટેલ ફરજ બજાવે છે.જેમાં આ અધિકારી સામે એક જાગૃત નાગરિકે લાંચ માગવામાં આવતી હોવાની એસીબી પોલીસમાં ફરિયાદ કરી હતી.આ જાગૃત નાગરિક સરકારી ગ્રાન્ટેડ છાત્રાલય ચલાવે છે.જેના માટે સરકાર દ્વારા છાત્રોના નિભાવ માટે ગ્રાન્ટ મળે છે. આ ગ્રાન્ટ પાસ કરાવવા અને તેમાં કોઈ ખામી ન કાઢવા માટે સમાજ કલ્યાણ અધિકારી અમિત પટેલે ₹10,000 ની લાંચ માંગી હતી.જે ફરિયાદી આપવા માંગતા ન હતા.જેથી તેમને એસીબીમાં આ અંગેની ફરિયાદ નોંધાવી હતી.જેને લઈને એસીબીના પોલીસ ઇન્સ્પેકટર એન.એ. ચૌધરીએ થરાદ ચાર રસ્તા,ભાભર રોડ, થરાદ ખાતે લાંચના છટકાનું આયોજન કર્યું હતું.જેમાં સમાજ કલ્યાણ અધિકારી અમિત પટેલ ₹10,000 ની લાંચ લેતા સપડાઈ ગયા હતા.જેથી એસીબીએ લાંચની રકમ રૂપિયા 10,000 તેમની પાસેથી રિકવર કરીને અટકાયત કરી હતી અને લાંચ રૂશ્વત ધારા હેઠળ તેમની વિરુદ્ધ કાર્યવાહી કરી હતી.
