મુંબઇ : આતંકવાદી સંગઠન લશ્કર-એ-તોઇબા સાથે સંબંધ ધરાવનારા જમ્મુ-કાશ્મીરના એક યુવકની મહારાષ્ટ્ર એન્ટી ટેરરિઝમ સ્ક્વોડ(એટીએસ)ધરપકડ કરી છે.ટેરર ફંડિંગ અને આતંકવાદી જૂથમાં યુવાનોની ભરતી કરવાના મામલે કાર્યવાહી કરવામાં આવી હોવાનું જાણવા મળ્યું છે.આ ચકચારજનક કેસમાં ગત મે મહિનાથી અત્યાર સુધી ચાર જણને પકડવામાં આવ્યા છે.
જમ્મુ-કાશ્મીરના ડોડાનો ૩૨ વર્ષીય યુસુફની ધરપકડ કરી વધુ તપાસ હાથ ધરવામાં આવી છે.શકમંદ આતંકવાદી જુનેદના ખાતામાં ફંડ ટ્રાન્સફર કરવાનો તેના પર આરોપ છે.અગાઉ પુણેમાં સ્થાનિક યુવકોને લશ્કર-એ-તોઇબામાં ભરતી કરવાના મામલામાં જુનેદને પકડવામાં આવ્યો હતો.તે સોશિયલ મિડિયાના માધ્યમથી આતંકવાદી સંગઠનના સંપર્કમાં હતો.જુનેદની પૂછપરછ બાદ તેના સાથીદાર ઇનામુલને ઝડપી લેવામાં આવ્યો હતો.ઇનામુલ હકની અગાઉ યુપી એટીએસ દ્વારા આતંકવાદી સંગઠન સાથે સાંઠગાંઠના આરોપસર ધરપકડ કરાઈ હતી.તે ત્યાંથી જેલમાં હતો.જુનેદના કેસમાં મહારાષ્ટ્ર એટીએસની ટીમે તેને કસ્ટડીમાં લીધો છે.આ ઉપરાંત મહારાષ્ટ્ર એટીએસના અધિકારીએ જમ્મુ-કાશ્મીરના આફતાબ હુસેન(ઉં.વ.૨૮)ને પકડયો છે.જુનેદ,ઇનામુલ આફતાબની પૂછપરછ કરાતા યુસુસની લશ્કર-એ-તોઇબા સાથે સાંઠગાંઠની જાણ થઈ હતી.
