અંબિકાપુર, તા. 05 માર્ચ, 2022,શનિવાર : છત્તીસગઢના અંબિકાપુર જિલ્લામાં એક સગીરે તેના માતા-પિતાની હત્યા કરી અને તેમના મૃતદેહને ઘરમાં જ દાટી દીધા હતા.આ ઘટના ઉદયપુર પોલીસ સ્ટેશન હેઠળના ખોંધલા ટીકરાપારા ગામની છે.ત્યારબાદ ઘટનાની માહિતી મળતાં જ પોલીસ અને ફોરેન્સિક વિભાગની ટીમ શનિવારે સવારે ઘટનાસ્થળે પહોંચી હતી અને તપાસમાં લાગી ગઈ હતી.પોલીસે સગીર આરોપીના કહેવા પ્રમાણે જમીનમાં દાટેલા મૃતદેહોને બહાર કાઢ્યા હતા.તેમણે કહ્યું કે આ ઘરમાં 50 વર્ષીય જયરામ સિંહ સાથે 45 વર્ષીય પત્ની ફુલસુંદરી બાઈ અને 2 પુત્રો રહેતા હતા.તેમનો મોટો દીકરો કામ અર્થે ઘરની બહાર ગયો હતો.આ દરમિયાન માતા-પિતાનો નાના પુત્ર સાથે કોઈ વાતને લઈને ઝઘડો થયો હતો.આ ઝઘડો એટલો વધી ગયો કે પુત્રએ તીક્ષ્ણ ખેત ઓજાર બાંસુલા વડે માતા-પિતાની હત્યા કરી નાખી.
ત્યારબાદ તેણે બંનેના મૃતદેહને ઘરના એક રૂમમાં દાટી દીધા. આટલું જ નહીં,સગીર પુત્રએ તે જ જગ્યાએ ભોજન પણ રાંધ્યું અને ખાધું હતું.પોલીસે ઘટનાસ્થળે પહેંચીને મૃતદેહોને બહાર કાઢીને પોસ્ટમોર્ટમ માટે મોકલી આપ્યા હતા.સાથે જ સગીર પુત્રને પોલીસે કસ્ટડીમાં લીધો છે.
એસડીઓપી ઉદયપુર અખિલેશ કૌશિકે જણાવ્યું હતું કે,તેમને મૃતકના જમાઈએ આ અંગે જાણકારી આપી હતી.હાલ આરોપી સગીરની પૂછપરછ કરવામાં આવી રહી છે.પૂછપરછ દરમિયાન એવું જણાય છે કે છોકરો માનસિક રીતે નબળો છે.તેણે ગુસ્સામાં આ ઘટનાને અંજામ આપ્યો છે.બીજી તરફ મૃતકના મોટા પુત્રએ જણાવ્યું કે,ઘટનાના દિવસે તે ઘરે નહોતો.તેને પણ તેના સાળાએ ફોન પર આ અંગે જાણ કરી હતી.
