પેગાસસ જાસૂસી કેસ : સુપ્રીમે વધુ એક મહિનાનો સમય આપ્યો

નવી દિલ્હી : પેગાસસ મામલે સુપ્રીમ કોર્ટે શુક્રવારે તપાસ પૂરી કરવા માટે વધુ એક મહિનાનો સમય આપ્યો છે.સુપ્રીમ કોર્ટે તપાસ પૂરી કરવા માટે અદાલત દ્વારા નીમાયેલી પેનલની સમયમર્યાદા ૨૦ જુન સુધી લંબાવી આપી છે.સુપ્રીમ કોર્ટના ભૂતપૂર્વ ન્યાયાધીશ આરવી રવિચંદ્રનના અધ્યક્ષ પદ હેઠળની સમિતિએ કોર્ટને સૂચના આપી કે કેટલાય પત્રકારો અને નિષ્ણાતો સાથે વાતચીત ઉપરાંત ૨૯ મોબાઇલ ઉપકરણોની તપાસ કરવામાં આવી.ટેકનિકલ સમિતિ મેના અંત સુધીમાં પેગાસસ નિરીક્ષણ પેનલને પોતાનો રિપોર્ટ સોંપે તેવી આશા છે.તેના પછી ૨૦ જુને સુપ્રીમ કોર્ટમાં આ રિપોર્ટ રજૂ કરવામાં આવશે. સુપ્રીમ કોર્ટે શુક્રવારે જણાવ્યું છે કે પેગાસસ સ્પાયવેરને લઈને ટેકનિકલ સમિતિએ ૨૯ મોબાઇલ ફોનની તપાસ કરી છે અને કેટલાક લોકોના નિવેદન પણ નોંધવામાં આવ્યા છે.સુપ્રીમ કોર્ટે કથિત પેગાસસ જાસૂસી કેસમાં તપાસ અહેવાલ નિરીક્ષક ન્યાયાધીશને સોંપવાની સમયમર્યાદા વધારતા
જણાવ્યું હતું કે આ પ્રક્રિયા ચાર અઠવાડિયામાં પૂરી થવી જોઈએ.કોર્ટે જણાવ્યું હતું કે પ્રભાવિત ઉપકરણોની તપાસ માટે માનક સંચાલન પ્રક્રિયાને પણ અંતિમ સ્વરુપ આપવામાં આવશે.પેગાસસ સ્પાયવોર સોફ્ટવેરને ઇઝરાયેલ સ્થિત એનએસઓ ગુ્રપ ટેકનોલોજીસ દ્વારા બનાવવામાં
આવ્યું છે.પેગાસસ સોફ્ટવેર દ્વારા જાસૂસી કરાવવાનો વિવાદ ફક્ત ભારત જ નહી બીજા કેટલાય દેશોમાં પણ સામે આવ્યો હતો.તે સમયે સોફ્ટવેર કંપનીએ જણાવ્યું હતું કે તે તેની સેવા ફક્ત સરકારોને વેચે છે.