નવી દિલ્હી : પેપર ઈન્ડસ્ટ્રી બોડી આઈપીએમએના જણાવ્યા અનુસાર દેશમાંથી પેપર અને પેપર બોર્ડની નિકાસ 2021-22માં 80 ટકા ઉછળીને ~13,963 કરોડ થઈ હતી,જે અત્યાર સુધીમાં સૌથી વધુ છે. ઈન્ડિયન પેપર મેન્યુફેક્ચરર્સ એસોસિએશન(IPMA)એ જણાવ્યું હતું કે તમામ ગ્રેડના પેપરની નિકાસ વધી હતી.મૂલ્યની દૃષ્ટિએ કોટેડ પેપર અને પેપરબોર્ડની નિકાસ 100 ટકા વધી હતી,જ્યારે અનકોટેડ રાઈટિંગ અને પ્રિન્ટિંગ પેપરની નિકાસ 98 ટકા વધી હતી.ટિશ્યૂ પેપરની નિકાસ 75 ટકા વધી હતી.ક્રાફ્ટ પેપરની નિકાસ 37 ટકા વધી હતી.છેલ્લાં પાંચ વર્ષથી દેશમાંથી પેપરની નિકાસ સતત વધી રહી છે.વોલ્યૂમની દૃષ્ટિએ જોઈએ તો પેપરની નિકાસ ચાર ગણી ઉછળીને 28.5 લાખ ટન થઈ હતી,જે પાંચ વર્ષ પહેલાં માત્ર 6.6 લાખ ટન હતી.વેલ્યૂની દૃષ્ટિએ પણ પાંચ વર્ષમાં પેપરની નિકાસ~3041 કરોડથી વધીને~13,963 કરોડ થઈ છે.
છેલ્લાં પાંચ-સાત વર્ષમાં પેપર મિલોએ~25,000 કરોડનું રોકાણ કર્યું છે અને નવી ઉત્પાદન ક્ષમતા ઊભી કરી છે.આ સાથે જ તેમણે ક્લીન અને ગ્રીન ટેક્નોલોજી પણ અપનાવી છે.સ્થાનિક કંપનીઓએ વિવિધ દેશોમાં માર્કેટિંગ પ્રયાસ વધાર્યા છે અને વિદેશોમાં પણ રોકાણ વધાર્યું છે જેને કારણે નિકાસને બળ મળ્યું છે.છેલ્લાં બે નાણાકીય વર્ષમાં વોલ્યૂમની દૃષ્ટિએ ભારત પેપરનો નેટ નિકાસકાર દેશ બન્યો છે.ભારત મુખ્યત્વે યુએઈ,ચીન,સાઉદી અરેબિયા,બાંગ્લાદેશ,વિયેતનામ અને શ્રીલંકાને પેપરની નિકાસ કરે છે.
