તેલઅવીવ તા.14 : ઈઝરાયેલ તથા પેલેસ્ટાઈન વિવાદે ભડકો સર્જાયો હોય તેમ યુદ્ધનો માહોલ સર્જાયો જ છે.હમાસ સામે બદલો લેવા માટે ઈઝરાયેલ જબરજસ્ત હવાઈ હુમલા કર્યા હતા તેમાં ગાઝામાં 29 બાળકો સહીત 109 લોકોનાં મોત નીપજયા હતા.પેલેસ્ટાઈનની ઉગ્રવાદી સંગઠન હમાસનાં સતત રોકેટ હુમલા વચ્ચે ઈઝરાયેલે હવાઈ હુમલા વધારવા સાથે સશસ્ત્ર હુમલા પણ કર્યા હતા.હમાસનાં ઠેકાણાઓ પર જમીની તથા હવાઈ હુમલા કરવામાં આવી રહ્યાનું ઈઝરાયેલી સૈન્ય પ્રવકતાએ જાહેર કર્યુ હતું.
ઈઝરાયેલી સૈન્યને પેલેસ્ટાઈનને જોડતી બોર્ડર પર તૈનાત કરી દેવામાં આવી છે અને તેના દ્વારા સશસ્ત્ર જમીની પ્રહાર પણ કરવામાં આવ્યા છે.ઉપરાંત ડઝનથી વધુ હવાઈ હુમલા કરવામાં આવ્યા હતા.વડાપ્રધાન બેન્જામીને નેતન્યાહુએ જાહેર કર્યુ કે આક્રમણ હજુ થોડા દિવસ ચાલુ રહેશે.ઈઝરાયેલી હુમલાથી પેલેસ્ટાઈનનાં ગાઝાનાં ઉતર અને પૂર્વીય ભાગ ધમાકાથી ધણધણતો રહ્યો હતો.બોર્ડર પરનાં સેંકડો પરિવારો પલાયન થઈ ગયા હતા.પેલેસ્ટાઈનનાં આરોગ્ય સુત્રોએ કહ્યું કે છેલ્લા ચાર દિવસમાં 109 લોકો માર્યા ગયા છે.તેમાંથી ગુરૂવારે જ બાવનના મોત થયા હતા. ઈઝરાયેલમાં સાત લોકોનાં મોત થયા છે.
ઈઝરાયેલ પેલેસ્ટાઈન વચ્ચે યુદ્ધની હાલત રોકવા ઈજીપ્ત,કતાર તથા યુનોના પ્રયત્નો હજુ સફળ થયા નથી.અમેરીકી પ્રમુખ જો બાઈડેને પણ હિંસા રોકવા આહવાન કર્યું હતું.રોકેટ હવાઈ હુમલા રોકવા અપીલ કરી હતી.હમાસ દ્વારા તેલઅવીવ પર વધુ રોકેટ છોડવામાં આવ્યા હતા તેમાંથી કેટલાંક એન્ટી મીસાઈલ સીસ્ટમથી નકામા થયા હતા.એક રોકેટ તેલ અવિવમાં ઈમારત પર ખાબકતા પાંચ ઈઝરાયેલી ઘાયલ થયા હતા.ઈઝરાયેલ પર અત્યાર સુધીમાં 1750 રોકેટ છોડવામાં આવ્યા છે.બીજી તરફ ઈઝરાયેલે ગાઝા બોર્ડર પર સૈન્ય ખડકી દેતા મોટા આક્રમણની આશંકા છે.બીજી તરફ ઈઝરાયેલમાં નવા આંતરીક પડકાર પણ ઉભો થવા લાગ્યો છે.યહુદી તથા આરબ વચ્ચે આપસી હુમલા થયા હતા.અમુક શહેરોમાં એકબીજા પર શેરીઓમાં હુમલા થતા સીવીલ વોરની ચેતવણી ઉચ્ચારવામાં આવી છે.એકબીજાના મકાન-દુકાનો ઉપરાંત કાર તથા હોટેલોમાં પણ હુમલા કરવામાં આવ્યા હતા.
