– ઈસુદાને જણાવ્યું કે, પોલીસ કહે છે કે કોઈ રેડ નથી પાડી પણ મને ખબર છે કે પોલીસ પર ઉપરથી દબાણ હશે
અમદાવાદ, તા. 12 સપ્ટેમ્બર 2022, સોમવાર : આમ આદમી પાર્ટીના રાષ્ટ્રીય સંયોજક અને દિલ્હીના મુખ્યમંત્રી અરવિંદ કેજરીવાલ રવિવારના રોજ પોતાના 3 દિવસીય રાજકીય પ્રવાસ અંતર્ગત ગુજરાત આવ્યા છે.ત્યારે આમ આદમી પાર્ટીના નેશનલ જોઈન્ટ જનરલ સેક્રેટરી ઈસુદાન ગઢવીએ અરવિંદ કેજરીવાલના આગમન બાદ પોલીસે આપના અમદાવાદના કાર્યાલય ખાતે રેડ પાડી હોવાનો દાવો કરતી ટ્વિટ કરી હતી.ત્યારબાદ અરવિંદ કેજરીવાલે પણ તે ટ્વિટને રીટ્વિટ કરીને ભાજપ બોખલાઈ ગયું છે અને દિલ્હી બાદ ગુજરાતમાં પણ દરોડા શરૂ કર્યા તે અર્થનું લખાણ લખ્યું હતું.
જોકે પોલીસના ઉચ્ચ અધિકારીએ મીડિયાને એમ જણાવ્યું હતું કે, શહેરની એક પણ પોલીસની ટીમે આમ આદમી પાર્ટીની ઓફિસામાં દરોડા કે સર્ચ ઓપરેશન નથી કર્યું.શહેર પોલીસને આ અંગેની જાણ પણ નથી.અમદાવાદ પોલીસે આ અંગે સ્પષ્ટતા કરતી ટ્વિટ પણ કરી હતી.
ઈસુદાન પોતાના દાવા પર અડગ
પોલીસ દ્વારા કરવામાં આવેલી આ પ્રકારની સ્પષ્ટતા બાદ ઈસુદાન ગઢવીએ રવિવારે રાતે 8:00 કે 9:00 વાગ્યા આસપાસ પોલીસના જવાનો આવ્યા હોવાનું જણાવીને પોતાના દાવા અંગે અડગતા દાખવી હતી.તેમણે ગુજરાતમાં આપનો ગ્રાફ વધી રહ્યો હોવાથી ભાજપ ડરી ગયું છે અને દિલ્હીની માફક ગુજરાતમાં પણ દરોડા પાડવામાં આવી રહ્યા હોવાનું જણાવ્યું હતું.ઈસુદાને જણાવ્યું કે, પોલીસ કહે છે કે કોઈ રેડ નથી પાડી પણ મને ખબર છે કે પોલીસ પર ઉપરથી દબાણ હશે.હાલ હિટલરશાહી ચાલી રહી છે અને પોલીસ ગ્રેડપે મામલે અવાજ ઉઠાવે તો કાર્યવાહી થાય છે. આ સાથે જ તેમણે એમ પણ કહ્યું હતું કે, તમારે રેડ પાડવી હોય તો અમારી બીજી ઓફિસો પર પણ આવો.
ગોપાલ ઈટાલિયાએ કરી તપાસની માગણી
આમ આદમી પાર્ટીના ગુજરાતના પ્રદેશ પ્રમુખ ગોપાલ ઈટાલિયાએ આ મામલે જણાવ્યું કે, રવિવારના રોજ આપની ડેટા એન્ડ મેનેજમેન્ટ ઓફિસ ખાતે અમદાવાદ પોલીસે સર્ચ ઓપરેશન કમ રેડ પાડી હતી.આજે પોલીસ કોઈ રેડ ન થઈ હોવાનું જણાવે છે.પરંતુ ગઈકાલે આપની ઓફિસે કેટલાક પોલીસ મિત્રો આવ્યા હતા.તેમણે નવરંગપુરા પોલીસ સ્ટેશનના ડી સ્ટાફમાંથી આવતા હોવાનું જણાવ્યું હતું અને 2 વ્યક્તિના કાર્ડ જોયા તેમાં હિતેશ અને પારસ નામ લખેલું હતું.તેમણે ઓફિસમાં રહેલા લેપટોપ,ડાયરી,ખાનાઓ વગેરેની ચકાસણી કરી હતી.અમદાવાદ શહેર પોલીસ કે ભાજપને લાગતું હોય કે કોઈ રેડ નથી થઈ તો આ હિતેશ અને પારસ નામના ડી સ્ટાફના કર્મીઓની તપાસ કરવામાં આવે. અમારી ઓફિસ થોડા સમય પહેલા શરૂ કરાઈ હોવાથી ત્યાં સીસીટીવી કેમેરા નથી પણ બાજુમાં એક બેંક છે એના સીસીટીવી કેમેરા ચેક કરો.અમે નવરંગપુરા પોલીસને પણ આ અંગે લેખિતમાં આપવાના છીએ.ઉપરાંત હિતેશ અને પારસ નામના જમાદારોના રવિવાર રાતના લોકેશન ચેક કરવામાં આવે.
