અમદાવાદ : વડોદરાના રાવપુરા પોલીસ સ્ટેશનમાં હેડ કોન્સ્ટેબલ અને LRDની સામે ASI દ્વારા જ એટલે કે પોલીસની ઉપર જ પોલીસ દ્વારા દારૂબંધીના કાયદા હેઠળની ફરિયાદ નોંધાવવાનો વિવાદ હાઇકોર્ટ સમક્ષ પહોંચ્યો હતો.જોકે હાઇકોર્ટ દ્વારા હાલના તબક્કે કથિત આરોપી પોલીસ કર્મચારીઓને કોઇ રાહત આપવાનું વલણ ન દાખવતા એડવોકેટ દ્વારા અરજી પરત ખેંચી લેવામાં આવી હતી.સુનાવણીની શરૂઆતમાં એડવોકેટે કોર્ટને કહ્યું હતું કે,‘પોલીસ વિરૂદ્ધ પોલીસની ફરિયાદનો આ દુર્લભ કેસ છે.’ત્યારે કોર્ટે એવી હળવી ટકોર કરી હતી કે,‘પોલીસ સામે પોલીસનો કેસ હોય તો કોર્ટનું શું કામ,પોલીસ જ કાર્યવાહી કરી લે.
અત્યંત વિચિત્ર આ કેસમાં હેડ કોન્સ્ટેબલ અને LRD કર્મચારી દ્વારા હાઇકોર્ટ સમક્ષ ક્વોશિંગ પિટિશન ફાઇલ કરવામાં આવી હતી.તેમના તરફથી કોર્ટને જણાવવામાં આવ્યું હતું કે,‘આ બંને પોલીસ કર્મચારીઓ છે અને તેમને અન્ય પોલીસ કર્મચારી ASI એ એક જ દિવસમાં બે ફરિયાદમાં સંડોવી કાઢવામાં આવ્યા છે.જેમાં મૂળ એવા આક્ષેપ કરવામાં આવ્યા છે કે અરજદાર પોલીસ કર્મીઓએ દારૂબંધી હેઠળના કેસમાં મુદ્દામાલ ઓછો દર્શાવ્યો હતો અને આરોપી ઘટનાસ્થળે ન હોવાનું અન્ય પોલીસને જણાવી આરોપીને મદદગારી કરી હતી.ધારો કે મદદગારી કરી પણ હોય તો પણ આ મામલે દારૂબંધીના કાયદા હેઠળની ધારા અમારી ઉપર લગાવવામાં આવી છે.જે તદ્દન ગેરવ્યાજબી અને અયોગ્ય છે.સંબંધિત રેડમાં દારૂનો માલ હોવાની બાતમી અરજદારોને મળી નહોતી.તેમણે પંચનામું કર્યું નહોતું કે પછી તેમની જોડે મુદ્દામાલ પણ નહોતો.તો પછી તેમને શા માટે ફરિયાદમાં સંડોવી કાઢવામાં આવ્યા.’
અરજદારોની એવી દલીલ પણ હતી કે,‘હેડ કોન્સ્ટેબલ છેલ્લા ૩૦ વર્ષોથી વધુ પોલીસ સેવામાં છે અને LRD કર્મી પણ પાંચ વર્ષથી સેવા આપી રહ્યા છે.હાલ આ મામલે તેમને નીચલી કોર્ટે જામીન આપી રાહત આપેલી છે.પરંતુ જો તેમની વિરૂદ્ધ ચાર્જશિટ થશે તો તેમની કેરિયર બરબાદ થઇ જશે.તેથી નામદાર હાઇકોર્ટ એટલી રાહત આપે કે કોર્ટની પૂર્વમંજૂરી વિના ચાર્જશિટ ફાઇલ કરવામાં ન આવે.’
