એજન્સી, નવી દિલ્હી

ફેબ્રુઆરીમાં દેશમાં રોજગારીની તકોમાં ઘટાડો થયો છે. આ દરમિયાન બેરોજગારીનો દર વધીને 7.78 ટકા થઈ ગયો છે. બેરોજગારીના દરમાં જાન્યુઆરીની સરખામણીમાં 0.62 ટકાનો વધારો થયો છે. સેન્ટર ફોર મોનિટરિંગ ઈન્ડિયન ઈકોનોમી (સીએમઆઈઈ) દ્વારા જાહેર કરવામાં આવેલા રિપોર્ટમાં આ આંકડા સામે આવ્યા છે.

રિપોર્ટમાં જણાવવામાં આવ્યું છે કે, આર્થિક સુસ્તીની અસર અર્થવ્યવસ્થા પર પડી રહી છે. નિષ્ણાંતોના મતે કોરોના વાયરસના વૈશ્વિક સ્તરે પ્રકોપના પગલે એશિયાની ત્રીજી સૌથી મોટી અર્થવ્યવસ્થામાં મંદી યથાવત રહેશે.

સીએમઆઈઈની રિપોર્ટમાં જણાવવામાં આવ્યું છે કે, ફેબ્રુઆરી માસમાં ગ્રામીણ ક્ષેત્રોમાં ઓછા લોકો રોજગારી પ્રાપ્ત થઈ છે. જેને કારણે ગ્રામીણ ક્ષેત્રમાં બેરોજગારીનો દર 7.37 ટકા પર પહોંચી ગયો છે. જ્યારે શહેરી વિસ્તારોમાં બેરોજગારીના દરોમાં ઘટાડો નોંધાયો છે અને જે જાન્યુઆરીના 9.70 ટકાની તુલનામાં ઘટીને ફેબ્રુઆરીમાં 8.65 ટકા પર પહોંચી ગયો છે.