પાલનપુર : કાણોદર પાસે ઇન્ડિયન ઓઇલ કોર્પોરેશનની SMPL પાઈપ લાઈનમાં પંક્ચર કરી ઓઇલ ચોરીના ગુનામાં હોટલ સંચાલક પાસે લાંચ માગવાના કેસમાં પાલનપુર એ.સી.બી.એ તાત્કાલિન એસ.ઓ.જી.ના ઇન્ચાર્જ પી.એસ.આઈ. સામે ગુનો નોંધ્યો છે.
કાણોદર પાસેની હોટલના પાછળ આઈ.ઓ.સી.ની SMPL પાઈપલાઈનમાં પંક્ચર કરી ઓઇલ ચોરીનો પર્દાફાશ એસ.ઓ.જી પોલીસે કર્યો હતો.આ ગુનામાં એસ.ઓ.જીના તાત્કાલિન ઇન્ચાર્જ પી.આઈ એન.એન.પરમારે ભાડેથી હોટલ ચલાવતા સંચાલકને ઓઇલ ચોરીના ગુનામાં જેલમાં જવું ન હોય તો તેને રૂ.ત્રણ લાખની લાંચ આપવી પડશે તેવું હોટલ સંચાલકના મિત્ર એવા ફરિયાદીને જણાવ્યું હતું.જોકે, રૂ.1.50 લાખની રકમ નક્કી થઇ હતી.
જેમાંથી રૂ.75,000 આપી દીધા હતા પરંતુ બાકીના રૂ.75,000 ન મળતા પી.આઈ.એ ફરિયાદીને ફોન કરી બાકીના રૂ.75,000ની માંગણી કરી હતી. પરંતુ આ મામલે એ.સી.બી.ને ફરિયાદ કરી હતી. જેને આધારે પાલનપુર એ.સી.બી.એ છટકું ગોઠવ્યું હતું. જે નિષફળ રહ્યું હતું.જોકે,એસીબીની વડી કચેરીએ પ્રાથમિક તપાસ કરવાનો હુકમ કર્યો હતો.
જે તપાસ દરમિયાન પુરાવાઓ મળતા સરકાર તરફે પાલનપુર એસીબીના એન.એ. ચૌધરીએ SOGના તાત્કાલિન ઇન્ચાર્જ પી.આઈ (હાલ દાહોદ ) વિરુદ્ધ ગુનો દાખલ કરેલ છે.જેની આગળની તપાસ પાટણ એ.સી.બી પી.આઈ જે. બી. સોલંકીએ હાથ ધરી છે.
