બાઇકચાલક બે શખ્સોએ વેપારીની આંખમાં મરચુ છાંટી ૧૮ લાખની લૂંટ મચાવી

મોરબી,તા.૨૫
મોરબીના વાવડી રોડ પર મંગળવારે વહેલી સવારે એક વેપારીને બે શખ્સે આંતરી રૂ.૧૮ લાખ ભરેલી બેગની લૂંટ ચલાવી ફરાર થઈ ગયા હતા. બનાવની જાણ થતાં મોરબી એ ડિવિઝન પોલીસ, ડીવાયએસપી સહિતનો સ્ટાફ ઘટનાસ્થળે દોડી ગયો હતો અને તપાસ હાથ ધરી હતી. બંને શખ્સોએ હેલ્મેટ પહેરી હતી અને મોઢે રૂમાલ બાંધ્યો હતો. ફરાર બંને લૂંટારૂઓ સીસીટીવીમાં કેદ થયા છે.
મોરબીમાં કાયદો વ્યવસ્થાની કથળી રહેલી સ્થિતિ પર જાણે સ્થાનિક પોલીસની ધાક સાવ ઉતરી ગઈ હોય તેમ એક પછી એક લૂંટનાં બનાવો વધી રહ્યા છે. હજુ ૨૦ તારીખના બેંક ઓફ બરોડામાં ૬.૪૦ લાખની લૂંટની ઘટનાંમાં ફરાર આરોપી ઝડપાયા નથી ત્યાં વધુ એક લૂંટથી પોલીસની ધાક ઉપર સવાલ ઉઠયા છે. બનાવની મળતી માહિતી મુજબ મોરબીના વાવડી રોડ પર આવેલી સોમૈયા સોસાયટીમાં રહેતા એક વેપારી તેની કારમાં ઓફિસ જવા નીકળ્યા હતા તે દરમિયાન હેલ્મેટ અને મોઢે રૂમાલ બાંધી બાઇકમાં આવેલા બે શખ્સે વેપારીની આંખમાં મરચું ફેંકી રૂ.૧૮ લાખ ભરેલા થેલાની લૂંટ ચલાવી ફરાર થઈ ગયા હતા. પોલીસે આસપાસના સીસીટીવી ફૂટેજ આધારે આરોપીઓની ઓળખ મેળવવા તેમજ મોરબી શહેર અને આસપાસ હાઇવે વિસ્તારમાં નાકાબંધી કરી આરોપી સુધી પહોંચવા કામગીરી હાથ ધરવામાં આવી છે.