બારડોલી : બારડોલીની સૃષ્ટિ મહિલા કો-ઓપ.ક્રેડિટ સોસાયટી લી.ની પ્રથમ વાર્ષિક સાધારણ સભા જિલ્લા પંચાયત પ્રમુખ ભાવેશ પટેલ અને ગજરાત સ્ટેટ ફ્રુટ એન્ડ વેજી.માર્કેટિંગ ફેડરેશનના પ્રમુખ રાજેશ પટેલની ઉપસ્થિતિમાં મળી હતી.જેમાં એજન્ડાના તમામ કામો સર્વાનુમતે મંજુર કરવામાં આવ્યો હતો.આ પ્રસંગે સંસ્થાના પ્રમુખ મનીષાબેન પરમારે સંસ્થાના પ્રથમ વર્ષની રૂપરેખા આપતા જણાવ્યું હતું કે, સંસ્થાએ 835 સભાસદો બનાવી રૂ.1.86 કરોડની થાપણ તેમજ 1.06 કરોડનું ધિરાણ કર્યું છે.ટૂંકા ગાળામાં થયેલી સંસ્થાની પ્રગતિ બદલ તેમણે સાથી ડિરેક્ટરો,સભાસદો અને કર્મચારી મંડળનો આભાર વ્યક્ત કર્યો હતો.આ પ્રસંગે ભાવેશ પટેલે જણાવ્યું હતું કે,શરૂઆતના સમયમાં થતું નુકસાન એ નુકસાન નહીં પણ વિકાસ છે.999 દિવસ પછી જ સંસ્થાની પ્રગતિ ખબર પડશે.તેમણે બહેનોને અભિનંદન પાઠવ્યા હતા.તેમણે વધુમાં ઉમેર્યું કે,બહેનોની બચત કરવાની વૃત્તિ હોય છે આથી સંસ્થામાં પણ બહેનોના રોજિંદા ખર્ચમાંથી બચાવેલા પૈસા મુકાય તે સારી બાબત છે.ગુજરાત સ્ટેટ ફ્રુટ એન્ડ વેજીટેબલ માર્કેટિંગ ફેડરેશનના પ્રમુખ રાજેશ પટેલે જણાવ્યું હતું કે,સૌથી સારી બચત મહિલાઓ કરતી હોય છે.અને આ બચતમાંથી સંસ્થા ઉત્તરોત્તર પ્રગતિ કરે તેવી શુભકામના પાઠવી હતી.
સાથે જ તેમણે સંસ્થાના સંચાલકોને લોભામણી લાલચમાં આવી આડી અવડી જગ્યાએ રોકાણ ન કરવાની સલાહ આપી હતી.આ એક સામાજિક સેવાનું કામ છે આથી નાના માણસો પાસેથી જ ધિરાણ અને ડિપોઝીટ લેવામાં આવે તે સંસ્થાના હિતમાં હોવાનું જણાવ્યું હતું.આ પ્રસંગે સરદાર પટેલ કો.ઓપ.ક્રેડિટ સો.ના પ્રમુખ જયંતિ પટેલ,બારડોલી પીપલ્સ કો-ઓપ.ક્રેડિટ સો.ના પ્રમુખ રાકેશ ગાંધી સહિતના અગ્રણીઓ ઉપસ્થિત રહ્યા હતા.
